← All books
AMPKIKUYUKJVNIVNKJVNLTNRSV
1Na rĩrĩ, mũndũ-wa-nja warĩ mũtumia wa mũndũ ũmwe wa thiritũ ya ariũ a anabii, nĩaakaĩire Elisha, akiuga atĩrĩ, Mũthuri wakwa ũrĩa ũrarĩ ndungata yaku nĩakuĩte; nawe nĩũũĩ atĩ ndungata ĩo yaku nĩĩretigĩrĩte Jehova; na nĩhokĩte mũrandũri ũrarĩ na thirĩ nake, na rĩu aiyĩrĩte twana twakwa twĩrĩ agatũtue ngombo.
2Nake Elisha agĩkĩmũũria atĩrĩ, Ũgũkĩenda ngwĩke atĩa? Ta njĩra; nĩ kĩ wĩ nakĩo gwaku nyũmba? Nake agĩkiuga atĩrĩ, Niĩ, ndungata yaku ya mũndũ-wa-nja, ndirĩ na kĩndũ o na kĩ nyũmba, tiga o ndigithũ ya maguta.
3Elisha agĩgĩcoka akĩmwĩra atĩrĩ, Thiĩ na kũu mĩciĩ ũkahoe ndigithũ cia andũ othe arĩa mũtũũranĩtie nao, o ndigithũ theri, itarĩ kĩndũ; ũhoe nyingĩ mũno.
4Na thutha wa ũguo ũtonye nyũmba, wĩhingĩre thĩinĩ mwĩ na ariũ aku, ũkĩmaitĩrĩre ndigithũ-inĩ icio ciothe; o ĩrĩa yaiyũra ũkamĩheta.
5Tondũ ũcio agĩkiuma harĩ we, akĩĩhingĩra nyũmba me na ariũ ake; nao magakĩmũtwaragĩra ndigithũ, agaciitĩrĩra maguta.
6Na gũgĩkinya atĩrĩ, atĩ ndigithũ icio ciaiyũra, akĩĩra mũrũwe atĩrĩ, Ndehere ndigithũ ĩngĩ. Nake agĩkĩmwĩra atĩrĩ, Hatirĩ ndigithũ ĩngĩ. Namo maguta magĩgĩtiga kuura.
7Agĩgĩthiĩ, akĩhe mũndũ ũcio wa Ngai ũhoro ũcio. Nake akĩmwĩra atĩrĩ, Gĩthiĩ ũkendie maguta macio, ũrĩhe thirĩ waku, wee nawe, mwĩ na ariũ aku, mũtũũrio nĩ marĩa megũtigara.
8Na gũgĩkinya atĩrĩ, atĩ mũthenya ũmwe Elisha akĩgerera Shunemu, handũ haarĩ mũtumia wĩ igweta; nake mũtumia ũcio akĩmũhatĩrĩria akarĩe irio gwake. Na gũgĩtuĩka o ro ũguo atĩ mahinda mothe rĩrĩa aahĩtũkĩra ho, agakerũra kũu arĩe irio.
9Nake mũtumia ũcio akĩĩra mũthuriwe ũũ: Atĩrĩrĩ, nĩnyonete atĩ mũndũ ũyũ ũhĩtũkagĩra haha haitũ mũciĩ hĩndĩ ciothe nĩ mũndũ mũtheru wa Ngai.
10Ndagũthaitha ũreke tũmũthondekere kanyũmba kanini haha rũthingo-inĩ, ĩgũrũ, tũcoke tũmũigĩre ũrĩrĩ ho, na metha, na gĩtĩ, o na mũtĩ wa kũigĩrĩrũo tawa; gũgĩtuĩke atĩ o hĩndĩ ĩrĩa oka gũkũ gwitũ, agatonya ho.
11Na gũgĩkinya atĩrĩ, atĩ mũthenya ũmwe, agĩkinya kuo, agĩkerũra agĩtonya kanyũmba kau, agĩkoma ho.
12Agĩkĩĩra Gehazi, ndungata yake, atĩrĩ, Ta ĩta mũtumia ũcio Mũshunemu. Nake agĩgĩĩtwo, akĩrũgama mbere yake.
13Nake Elisha akĩĩra Gehazi atĩrĩ, Ta kĩmwĩre ũũ: Atĩrĩrĩ, tondũ nĩũtũtugĩte ũgatwĩka maũndũ maya mothe-rĩ, wee nawe ũgũkĩenda wĩkwo atĩa? Nĩũkwenda warĩrĩrio he mũthamaki, kana he mũnene wa mbũtũ ya ita? Nake agĩcokia atĩrĩ, Niĩ ndũũraga thĩinĩ wa andũ aitũ kĩũmbe.
14Agĩgĩcoka akĩũria Gehazi atĩrĩ, Egũgĩĩkwo atĩa? Nake agĩcokia atĩrĩ, Ti-itherũ ndarĩ kahĩĩ, na mũthuriwe nĩ mũkũrũ.
15Nake Elisha agĩkiuga atĩrĩ, Ta mwĩte. Nake etwo, akĩrũgama mũrango-inĩ.
16Nake Elisha akĩmwĩra atĩrĩ, Ihinda o ta rĩrĩ, kĩmera kĩu kĩngĩ-rĩ, nĩũgakorũo ũnyitĩte kaana gaku ga kahĩĩ na moko maku. Nake akiuga atĩrĩ, Aca, mwathi wakwa, mũndũ ũyũ wa Ngai, tiga kũ’henia niĩ, ndungata yaku ya mũndũ-wa-nja.
17Nake mũndũ-wa-nja ũcio agĩkĩgĩa ihu, agĩciara kahĩĩ ihinda o rĩu erĩtwo, kĩmera gĩakinya, o ta ũrĩa Elisha oigĩte.
18Na rĩrĩ, kaana kau gaakũrakũra-rĩ, gũgĩkinya atĩrĩ, atĩ mũthenya ũmwe gakiumagara gagĩthiĩ gwĩ ithe kũrĩa agethi maarĩ.
19Nako gagĩkĩĩra ithe atĩrĩ, Wũi mũtwe-ĩ Wũi mũtwe-ĩ! Nake ithe akĩĩra ndungata yake atĩrĩ, Gakuue ũgatwarĩre nyina.
20Nake rĩrĩa aakoire agĩgatwarĩra nyina-rĩ, gagĩikara maru-inĩ make nginya o mĩaraho, gagĩgĩkua.
21Nake mũtumia ũcio agĩkĩambata, agĩgakomia ũrĩrĩ wa mũndũ ũcio wa Ngai, agĩkahingĩra kũu thĩinĩ, agĩcoka akiuma,
22agĩgĩĩta mũthuriwe, akĩmwĩra atĩrĩ, Ndagũthaitha ndehithĩrie mũndũ ũmwe wa ndungata ciitũ, o na ndigiri ĩmwe, nĩguo ’hanyũke nginye he mũndũ ũcio wa Ngai, mũira wa njoke.
23Nake akiuga atĩrĩ, Ũgũgĩthiĩ harĩ we ũmũthĩ nĩkĩ? Na ti karũgamo ka mweri, kana mũthenya wa thabatũ? Nake agĩkiuga atĩrĩ, Gũtirĩ ũndũ.
24Agĩgĩtandĩkithia ndigiri, akĩĩra ndungata yake atĩrĩ, Mĩtindĩke tũthiĩ na mbere; na ndũgatigithĩrie itakwĩrĩte.
25Tondũ ũcio, agĩthiĩ agĩkinya he mũndũ ũcio wa Ngai o kĩrĩma-inĩ gĩa Karimeli. Na gũgĩkinya atĩrĩ, atĩ hĩndĩ ĩrĩa mũndũ ũcio wa Ngai aamuoneire o haraya, akĩĩra Gehazi, ndungata yake, ũũ: Atĩrĩrĩ, ũrĩa nĩ mũtamia ũrĩa Mũshunemu;
26ndagũthaitha teng’era mũcemanie ũmũũrie atĩrĩ, Wĩ mũhoro? Ĩ mũthuriguo nĩ mũhoro? Ĩ kaana kanyu o nako nĩ kahoro? Nake agĩcokia atĩrĩ, Ĩĩ, nĩ kũhoro.
27Na rĩrĩ, aakinya he mũndũ ũcio wa Ngai o hau kĩrĩma-inĩ-rĩ, akĩmũnyita magũrũ. Nake Gehazi agĩthengerera hakuhĩ nĩguo amũthengie; no rĩrĩ, mũndũ ũcio wa Ngai akĩmwĩra atĩrĩ, Mũtige, nĩ ũndũ e na ũndũ ũmũiguithĩtie ruo ngoro, nake Jehova nĩa’hithĩte ũndũ ũcio, akaaga kũnjĩra.
28Hĩndĩ ĩo mũtumia ũcio agĩkiuga atĩrĩ, Rĩu-rĩ, niĩ kwĩ hĩndĩ ndakĩendire kũheo mwana nĩwe, wee mwathi wakwa? Githĩ ndiakwĩrire atĩrĩ, Tiga kũ’henia?
29Nake Elisha agĩkĩĩra Gehazi atĩrĩ, Wĩhotore, woe rũthanju rũakwa, ũrũnyite na guoko, ũthiĩ naruo; na wacemania na mũndũ o na ũrĩkũ, ndũkamũgeithie; na mũndũ o na ũrĩkũ aakũgeithia, ndũkamũtumũke; ũthiĩ ũkĩigĩrĩre rũthanju rũrũ rũakwa o ũthiũ-inĩ wa kaana kau.
30Nake nyina wa kaana kau akiuga atĩrĩ, O ta ũrĩa Jehova atũũraga muoyo, o na ta ũrĩa wee mwene ũtũũraga muoyo-rĩ, ndingĩgũtiga. Nake agĩgĩũkĩra, akĩmũrũmĩrĩra.
31Nake Gehazi agĩthiaga mbere yao, akĩigĩrĩra rũthanju rũu o ũthiũ-inĩ wa kaana kau; no rĩrĩ, hatiigana kũgĩa mũgambo, kana kũiguwo ũndũ. Tondũ ũcio agĩkĩhũndũka nĩguo agacemanie na Elisha, akĩmũhe ũhoro, akiuga atĩrĩ, Kaana gatinokĩra.
32Na rĩrĩ, hĩndĩ ĩrĩa Elisha aakinyire nyũmba, agĩkora kaana kau gakuĩte, na gagakomio gĩtanda-inĩ gĩake.
33Agĩgĩtonya, akĩĩhingĩra na mũrango marĩ o erĩ nako, akĩhoya Jehova.
34Nake akĩhaica ũrĩrĩ, agĩkomera kaana, agĩĩkĩra kanua gake o kanua-inĩ gako, na maitho make o maitho-inĩ mako, namo moko make o moko-inĩ mako; agĩĩtambũrũkia igũrũ rĩako, naguo mwĩrĩ wa kaana kau ũgĩitĩka kũgĩa ũrugarĩ.
35Agĩcoka agĩũkĩra, agĩthianga kuo ũũ na ũũ, agĩcoka akĩhaica ho rĩngĩ, agĩĩtambũrũkia igũrũ rĩako; nako kaana kau gagĩathimũra maathimũra mũgwanja, na gakĩhingũra maitho.
36Elisha agĩgĩĩta Gehazi, akĩmwĩra atĩrĩ, Ita mũtumia ũcio Mũshunemu; agĩkĩmwĩta. Nake aatonya harĩ we, agĩkĩmwĩra atĩrĩ, Oya mũrũguo.
37Agĩgĩtonya nyũmba thĩinĩ, akĩĩgũithia thĩ magũrũ-mĩ make, akĩmũinamĩrĩra o hau thĩ; agĩcoka akĩoya mũrũwe, akiuma nja.
38Nake Elisha agĩcoka Giligali; nakuo kũu bũrũri ũcio gũgĩkorũo kwarĩ ng’aragu; nayo thiritũ ya ariũ a anabii ĩgĩkorũo ĩikarĩte thĩ mbere yake; nake agĩkĩĩra ndungata yake atĩrĩ, Hagĩra nyũngũ ĩrĩa nene, ũrugĩre ariũ aya a anabii irio.
39Mũndũ ũmwe wao agĩkiuma agĩthiĩ ngamba-inĩ gũtua nyeni, akĩona mũtĩ ũtambaga, agĩtua nyamũ itariĩ ta maage ciaguo, agĩciiyũria nguo-inĩ yake, agĩthiĩ agĩcikeranga agĩciĩkĩra nyũngũ-inĩ ĩo ya irio; nĩ ũndũ matiacimenyaga.
40Nao magĩkĩihũrĩra andũ acio marĩe. Na gũgĩkinya atĩrĩ, atĩ hĩndĩ ĩrĩa maarĩaga irio icio-rĩ, magĩkaya, makiuga ũũ: Wũi mũndũ wa Ngai-ĩ! Nyũngũ-inĩ ĩno he gĩkuũ. Nao matiahotire kũrĩa irio icio.
41No rĩrĩ, Elisha akiuga atĩrĩ, Kũngĩkorũo nĩ ũguo-rĩ, ta kĩrehei mũtu. Nake akĩũikia nyũngũ, agĩcoka akiuga atĩrĩ, Rĩu ihũrĩrai andũ marĩe. Naho hagĩgĩkorũo hatiarĩ ũndũ mũũru nyũngũ-inĩ ĩo.
42Na rĩrĩ, hagĩgĩũka mũndũ oimĩte Baali-shaliha, akĩrehere mũndũ ũcio wa Ngai irio cia mũro wa mbere, nacio nĩ mĩgate mĩrongo ĩĩrĩ ya cairi, o na igira njigũ cia ngano aciĩkĩrĩte kĩondo-inĩ. Nake akiuga atĩrĩ, Cinengere andũ marĩe.
43Nayo ndungata yake ĩkĩmũũria atĩrĩ, Hĩ! Atĩ atĩa? Njigĩre andũ igana mĩgate o ro ĩno? No Elisha akiuga atĩrĩ, Mĩhe andũ marĩe; nĩ gũkorũo Jehova oigĩte ũũ: Nĩmekũrĩa, na nĩmekũmĩtigaria.
44Tondũ ũcio ndungata yake ĩgĩkimĩiga mbere ya andũ acio, nao makĩrĩa na makĩmĩtigaria, o ta ũrĩa uuge wa Jehova watariĩ.
Sign in to highlight verses and keep them in sync with the mobile app.