← All books
AMPKIKUYUKJVNIVNKJVNLTNRSV
1Mũndũ angĩiya ng’ombe kana mbũri amĩthĩnje kana amĩendie, ng’ombe ĩo ĩmwe-rĩ, akamĩrĩha na ng’ombe ithano; nayo mbũri ĩo ĩmwe-rĩ, amĩrĩhe na mbũri inya.
2Na mũici ũcio angĩnyitwo akĩenja nyũmba, agũthwo akue, gũtikagĩa irĩhi rĩa thakame ĩo ĩitĩtwo.
3No rĩrĩ, angĩĩkwo ũguo gũkĩĩte-rĩ, hĩndĩ ĩo nĩgũkagĩa irĩhi rĩa thakame ĩo ĩitĩtwo. Na rĩrĩ, mũici ũcio no mũhaka agacokia indo iria aiyĩte na ingĩ. Na angĩkorũo atarĩ na kĩndũ, endio nĩ ũndũ wa ũici wake.
4Na rĩrĩ, kĩndũ kĩrĩa aiyĩte kĩngĩkorererũo kĩrĩ o muoyo, e nakĩo, o na kĩngĩtuĩka nĩ ng’ombe, kana ndigiri, o na kana mbũri, akarĩha maita merĩ.
5Mũndũ angĩrĩithia mũgũnda wene, o na kana arĩithie mũgũnda wene wa mĩthabibu, ohorete ng’ombe yake ĩgathiĩ kũrĩa mũgũnda wa mũndũ ũngĩ-rĩ, akamũrĩha na irio iria njega mũno cia mũgũnda wake, o na amũrĩhe na thabibu iria njega mũno cia mũgũnda wake.
6Na rĩrĩ, mwaki ũngĩrĩrĩmbũka ũgwate rũgiri rũa mĩigua, na tondũ ũcio itĩa iria ciohetwo cia ngano, o na kana ngano ĩrĩa ĩrũngiĩ ĩtarengetwo, ĩhĩe ĩthire, o na kana mũgũnda wothe-rĩ, mwakia mwaki ũcio ndarĩ hingo atagacokia irio icio na ingĩ.
7Mũndũ angĩnengera ũrĩa ũngĩ mbia ciake kana indo ingĩ ciake amũigĩre, na indo icio ciiyũo irĩ gwake nyũmba-rĩ, mũici wacio angĩnyitwo, akarĩha maita merĩ.
8No rĩrĩ, mũici angĩaga kuonwo, no mũhaka mwene nyũmba ĩo akuhĩhĩrie harĩ aciri nĩ getha kũmenyeke kana hihi we mwene aaya gũkorũo atahutĩtie indo cia mũndũ ũcio ũngĩ.
9Nĩ gũkorũo ha ũhoro wothe wa kwagarara watho, o na ũngĩkorũo wĩ wa ng’ombe, kana wa ndigiri, kana mbũri, kana nguo, o na kana wa kĩndũ o na kĩ kĩrĩa kĩũrĩte-rĩ, mũndũ angiuga ũũ: Gĩkĩ nĩ gĩakwa, ũhoro wa andũ acio erĩ-rĩ, nĩũtwarũo mbere ya aciri; na thĩinĩ wa andũ acio erĩ, ũrĩa aciri acio magatuĩra cira atĩ nĩwe wehĩtie, arĩhe maita merĩ.
10Mũndũ angĩhithia ũrĩa ũngĩ ndigiri, kana ng’ombe, kana o mbũri, o na kana nyamũ ĩngĩ o na ĩrĩkũ, nayo ĩkue, kana ĩĩkwo ũũru o na ũrĩkũ, o na kana ĩtahwo, na kwage mũndũ wonete ũndũ ũcio,
11nĩgũkagĩa mwĩhĩtwa mbere ya Jehova, thĩinĩ wa andũ acio erĩ, wa atĩ hihi mũndũ ũcio wahithĩtio aaya gũkorũo atahutĩtie kĩndũ gĩa ũcio ũngĩ; nake mwene no mũhaka etĩkĩre mwĩhĩtwa ũcio, na hatikagĩa ndĩhanio.
12No rĩrĩ, nyamũ ĩo ĩngĩiyũo ĩĩ gwake, nĩakarĩha mwene yo.
13Ningĩ ĩngĩrĩĩka-rĩ, nĩakonania irembuĩ ciayo nĩguo hagĩe ũira; na mũhithio ndakarĩha nyamũ ĩo ĩrĩĩkĩte.
14Na rĩrĩ, mũndũ angĩgwatio nyamũ o na ĩrĩkũ nĩ mũndũ ũngĩ, nayo yone ũũru, kana ĩkue, na mwene yo akorũo atarĩ ho, ndarĩ hingo atakamĩrĩha;
15no rĩrĩ, mwene yo angĩkorũo arĩ ho, hatikagĩa irĩhi; ningĩ nyamũ ĩo ingĩkorũo nĩ ya gũkomborithio ĩkarutĩrũo mbia-rĩ, ndĩkarĩhwo, nĩ ũndũ nĩyoneire mwene yo mbia.
16Ningĩ mũndũ angiuha mũirĩtu ũtorĩtio, nake akome nake, ndarĩ hingo atakaruta rũracio, amũgũre atuĩke mũka.
17Na rĩrĩ, ithe wa mũirĩtu angĩrega o kũrega atwarũo nĩ mũndũ ũcio, o na hĩndĩ ĩo ndarĩ hingo atakaruta mbia o ta iria ingĩracio mũirĩtu akĩgũrũo.
18Ndũkanareke mũndũ-wa-nja mũrogi atũũre muoyo.
19Mũndũ o na ũrĩkũ angĩgwata nyamũ ndarĩ hingo atakoragwo.
20Mũndũ ũrĩa ũkarutĩra ngai ingĩ igongona, tiga o Jehova wiki, nĩaamũrũo wa kũninwo biũ.
21Ndũkaneke mũndũ wa kũngĩ ũũru, kana ũmũhinyĩrĩrie, nĩ ũndũ o na inyuĩ nĩmwatũire bũrũri wa Misiri mũrĩ andũ a kũndũ kũngĩ.
22Ndũkananyarire mũka wa ndigwa o na ũrĩkũ, kana mwana wa ngoriai.
23Na rĩrĩ, ũngĩmanyarira na ũndũ o na ũrĩkũ, nao mangaĩre-rĩ, ndirĩ hingo itakaigua gũkaya kwao,
24njinwo nĩ marakara, ndĩmũũragithie na hiũ cia mbaara, o nao atumia anyu matuĩke ndigwa, o na ciana cianyu ituĩke cia ngoriai.
25Na rĩrĩ, ũngĩohorera mũndũ o na ũrĩkũ mbia wa andũ akwa arĩa mwĩ nao, tigaga gũtinda ũkĩmũrandũra, kana ũmwĩtagie uumithio wa mbia icio.
26Ũngĩthiĩ na nguo ya mũndũ o na ũrĩkũ, atĩ nĩguo akamĩkũũra kũrĩ wee-rĩ, nĩũkamũcokeria nguo ĩo mũthenya o ro ũcio riũa rĩtanathũa;
27nĩ gũkorũo nguo ĩo iiki noyo arĩ nayo ya kwĩhumba, na nĩyo ahumbagĩra mwĩrĩ wake nayo; rĩu-rĩ, kaĩ agagĩkomera kĩ? Na nĩgũgakinya atĩrĩ, atĩ rĩrĩa akangaĩra, no kũigua ngamũigua; nĩ ũndũ niĩ ndĩ wa tha.
28Ndũkanarume Ngai, o na kana ũrume mũnene wa andũ anyu.
29Ndũkanaikare mũno ũtandutĩire maciaro ma irio ciaku iria ũingĩhĩirũo nĩcio, o na indo ciaku iria ũnyuaga. Irigithathi o rĩothe rĩa ariũ aku nĩrĩo ũka’he rĩtuĩke rĩakwa.
30Na ũguo noguo ũgeka ũhoro-inĩ wa ng’ombe ciaku, o na mbũri ciaku; rĩgaikara mĩthenya mũgwanja na nyina, na mũthenya wa ĩnana nĩguo ũkarĩ’he.
31Na inyuĩ nĩmũgatuĩka atheru, aamũrĩre niĩ mwene; tondũ ũcio mũtikanarĩe kĩrembuĩ gĩa kĩrĩa kĩrĩĩkĩire werũ, no nĩmũgagĩikĩria ngui.
Sign in to highlight verses and keep them in sync with the mobile app.