← All books
AMPKIKUYUKJVNIVNKJVNLTNRSV
1Na rĩrĩ, kĩruka-inĩ kĩa Jesii nĩhakoima mũndũ, ta arĩ we thuuna ĩcomokete mũtĩ-inĩ, na rũhonge rũu rũkoima mĩri-inĩ yake nĩrũgaciara maciaro.
2Roho wa Jehova nĩũgaikara ũmũhubĩte, o roho wa ũũgĩ na wa ũmenyi maũndũ, o roho wa ũtaarani na hinya, na nĩguo roho wa kũũhĩgania, na gwĩtigĩrithia Jehova;
3o namo maũndũ marĩa makamũkenagia makoimana na gwĩtigĩra Jehova; ningĩ ndagatuaga cira na gĩthiithi, o na kana arũithanie na ũndũ wa kũigua njukũ.
4No rĩrĩ, athĩni akamatuagĩra cira na ũthingu, nao arĩa ahoreri a gũkũ thĩ amarũĩrĩre na kĩhooto; na rĩrĩ, andũ a thĩ arĩa ahinyanĩrĩria akamahũra na rũthanju rũa kanua gake, o nao arĩa aaganu amorage na mĩhũmũ ya mĩromo yake.
5Ũthingu nĩguo ũgatuĩka mwĩhotoro wake, o naguo wĩhokeki ũtuĩke mũcibi wa njohero yake.
6Njũi ĩgatũũranagia na kagondu, na ngarĩ ĩkomanagie na kori, ningĩ gacaũ ka ng’ombe o na ka mũrũthi, o na kanyamũ ga gĩcegũ, tũikaranagie hamwe; na rĩrĩ, tũgatongoragio nĩ kaana kanini.
7Ng’ombe na nduba ikarĩaga hamwe, na tũcaũ twacio tũkomanagie hamwe, ningĩ mũrũthi ũkarĩaga nyeki o ta ndegwa.
8Kaana gekuonga-rĩ, gagathaakagĩra irima-inĩ rĩa nduĩra, o nako kaana karĩa gatuĩte iria gaikagie guoko gwako irima-inĩ rĩa gĩĩko.
9Gũtikageranwo ngero, kana kũninanwo, kũu kĩrĩma-inĩ gĩakwa kĩrĩa gĩtheru guothe, nĩ gũkorũo thĩ yothe nĩĩkaiyũrũo nĩ ũhoro wa kũmenya Jehova o ta ũrĩa maĩ maiyũrĩte iria-inĩ.
10Na nĩgũgakinya atĩrĩ, mũthenya ũcio, atĩ mũndũ ũcio ũkoima mĩri-inĩ ya Jesii, o we ũrĩa ũkarũgama atuĩke ta kĩbebero harĩ ndũrĩrĩ, nĩwe ũkarongoragio nĩ ndũrĩrĩ icio; naguo ũtũũro wake wonagwo ũrĩ riri.
11Na nĩgũgakinya atĩrĩ, mũthenya ũcio, atĩ Mwathani nĩagatambararia guoko gwake ihinda rĩa kerĩ akũũre matigari ma andũ ake, o arĩa magakorũo matigarĩte, amoimie Ashuri, na Misiri, na Patherosi, na Kushi, na Elamu, na Shinaru, na Hamathu, o na mabũrũri-inĩ marĩa me hũgũrũrũ-inĩ cia iria.
12Nake nĩakahandĩra ndũrĩrĩ kĩbebero, nao andũ a Isiraeli arĩa mateetwo amonganie, na acokererie andũ a Juda arĩa mahurunjũkĩte moime ituri-inĩ iria inya cia thĩ.
13O naguo ũiru ũrĩa ũiguĩrĩirũo Efiraimu nĩũgathira, nao andũ arĩa manyariraga Juda nĩmakaingatwo mehere; ningĩ Efiraimu ndagacoka kũiguĩra Juda ũiru, kana Juda acoke kũnyarira Efiraimu.
14Nao nĩmagaikũrũkanĩria ng’ongo cia Afilisiti na rũere rũa ithũĩro, na matahe ciana cia mwena wa irathĩro me hamwe, namo moko mao mamatambũrũkĩrie Edomu na Moabi, na ciana cia Amoni imaathĩkagĩre.
15Nakuo kũrĩa iria rĩa Misiri rĩcomokete ta rũrĩmĩ-rĩ, Jehova nĩakarĩhũithia biũ; ningĩ ainainĩrie guoko gwake igũrũ rĩa Rũũĩ rũa Farati ta arĩ rũhuho rũkũhurutana na hinya, arũgũthe, arũgayũkanie rũtuĩke tũrũũĩ mũgwanja, nĩguo andũ mahote kũrũringa matekũruta iratũ.
16Nakuo nĩgũkagĩa njĩra ya gĩtwari yumĩte Ashuri nĩ ũndũ wa matigari ma andũ ake, o arĩa magakorũo matigarĩte kuo, o ta ũrĩa andũ a Isiraeli moneirũo mũthenya ũrĩa maambatire moimĩte bũrũri wa Misiri.
Sign in to highlight verses and keep them in sync with the mobile app.