← All books
AMPKIKUYUKJVNIVNKJVNLTNRSV
1Atĩrĩrĩ, mehia ma Juda maandĩkĩtwo na karamu ga kĩgera, o na magakururũo na mũthia mũũgĩ wa kahiga karĩa getagwo arimathi; ĩĩ, ti-itherũ makururĩtwo ihengere-inĩ ciao cia ngoro, o na magakururũo hĩa-inĩ cia igongona ciao.
2Nacio ciana ciao no iririkanaga kũndũ kwao kũrĩa kũrutagĩrũo magongona, o na Maashera mao marĩa mahandĩtwo ithũngũri-inĩ mĩtĩ-inĩ ĩrĩa mĩruru.
3Wũi-ĩiya-wakwa, wee kĩrĩma gĩakwa kĩrĩa kĩrĩ ng’ũndũ-inĩ-ĩ! Nĩ gũtũma ngatũma ũcumwo indo ciaku ciothe cia bata, o na mũthithũ waku wothe ũtahwo, o na ningĩ matĩri maku ma kũndũ gũtũũgĩru ndũme mathahio nĩ ũndũ wa ũrĩa mehia mahunjĩte makaiyũra bũrũri waku o nginya mĩhaka-inĩ yaguo.
4Wee nawe-rĩ, nĩ kũrindũra ngarindũra andũ arĩa matũũraga kũu gwaku, matigane na ũgai ũrĩa ndamarathimĩire, na ndũme matungatĩre thũ ciao me bũrũri ũrĩa matoĩ; nĩ ũndũ nĩ marakara makwa matũmĩte gwakio mwaki o ũrĩa ũgũtũũra wakanaga nginya tene na tene.
5Ningĩ Jehova ekuuga ũũ: Atĩrĩrĩ, kũgwatwo nĩ kĩrumi-rĩ, nĩ mũndũ ũrĩa wĩhokaga andũ a gũkũ thĩ, o na kana akehotora ehokete hinya wao, ngoro yake ĩgatirika Jehova.
6Nĩ gũkorũo agatuĩka o ta kamũtĩ keng’ang’ĩtie werũ-inĩ kũrĩa gũtarĩ wega o na ũrĩkũ ũngĩmũkinyĩra, no egũtũũra kũndũ kũũmũ kwĩ nyota werũ-inĩ, o rũng’ũrĩ rũa cumbĩ rũtatũũragwo nĩ andũ.
7No rĩrĩ, gũkena-rĩ, nĩ mũndũ ũrĩa wĩhokaga Jehova, na agatua Jehova mwĩhoko wake.
8Nĩ ũndũ agatuĩka o ta mũtĩ ũhandĩtwo hũgũrũrũ-inĩ cia maĩ, ũrĩa ũtambagia mĩri yaguo gũkuhĩ na rũũĩ; na rĩrĩa kwagĩa ũrugarĩ wa riũa-rĩ, mũtĩ ũcio ndũngĩhoha, no ithangũ rĩaguo rĩgũtũũra rĩrĩ iruru; na rĩrĩ, mũtĩ ta ũcio ndũrĩ ũndũ ũngĩũtanga mwaka wa wathima, na ndũngĩtiga gũciara maciaro.
9Ngoro ya mũndũ nĩĩhenanagia gũkĩra ciũmbe iria ingĩ ciothe, nayo ĩtũire ĩthugundaga maũndũ ma waganu. Nũ ũngĩkĩhota gũthuuthuuria ũhoro wayo?
10Niĩ Jehova nĩ niĩ ’thuuthuuragia ũhoro wa ngoro, na ngoiruria maũndũ marĩa mahithe meciria-inĩ, nĩ getha ndathimĩre mũndũ o mũndũ maũndũ marĩa maringaine na mĩthiĩre yake, o na makaringana na maciaro ma maũndũ marĩa ekaga.
11O ta ũrĩa ngware ĩkomagĩrĩria matumbĩ marĩa ĩtareketie yo nyene-rĩ, ũguo noguo mũndũ ũrĩa wĩonagĩra ũtonga na njĩra ĩtarĩ ya kĩhooto atariĩ; o hĩndĩ ĩrĩa aagwata kũigananĩria matukũ ma muoyo wake-rĩ, ũtonga ũcio nĩũkamweherera, naho ha ũhoro wake wa kũrigĩrĩria onagwo ta arĩ o kĩrimũ.
12Kaĩ handũ haitũ harĩa haamũre hahaanaine na gĩtĩ gĩa ũthamaki kĩĩ riri kĩaigirũo handũ hatũũgĩru o kĩambĩrĩria-ĩ!
13Wee Jehova, mwĩhoko wa Isiraeli, andũ othe arĩa magũtirikaga-rĩ, nĩmagaconorithio; o nao andũ arĩa mathengaga harĩ wee nĩmakaandĩkwo marĩĩtwa mao rũkũngũ-inĩ rũa thĩ, nĩ gũkorũo nĩmatirikĩte Jehova, o we gĩthima kĩa maĩ ma muoyo.
14Wee Jehova, ’honia na nĩngũhoneka; ’honokia, na nĩngũhonokeka; nĩ ũndũ wee nowe ngoocithagia.
15Atĩrĩrĩ, andũ manjũragia ũũ: Ndũmĩrĩri iria ciumaga harĩ Jehova ikĩrĩ na kũ? Ta nĩikĩheanwo ũhoro wacio rĩu.
16No rĩrĩ, ha ũhoro wakwa-rĩ, ndĩĩyeheretie ũrĩithi-inĩ waku ngatiga gũkũrũmĩrĩra; nĩngĩ ndiigana kwĩrirĩria atĩ mũthenya wa kĩeha ũhĩke gũkinya, o mũthenya wa kĩeha kĩrĩa kĩnene mũno; wee nĩũũĩ ũhoro ũcio, tondũ mohoro marĩa ndaaririe na kanua gakwa nĩmaarũngarĩte wega makĩiguwo nĩwe.
17Tiga gũtuĩka wa kũndua nda, amu wee nowe mũrahĩro wakwa wa hĩndĩ ya ũũru.
18Arĩa ma’nyariraga maroconorithio; no rĩrĩ, niĩ tiga kũnjonorithia; ningĩ marogegeara, no rĩrĩ, niĩ tiga kũreka ngegeare; marorokerũo nĩ mũthenya wa ũũru, na ũmanine na ininana inene rĩa kũmang’aria maita merĩ.
19O na ningĩ Jehova aanjĩrire ũũ: Atĩrĩrĩ, thiĩ ũrũgame kĩhingo-inĩ kĩrĩa gĩĩtagwo kĩhingo gĩa ciana cia kĩrĩndĩ, o kĩhingo-inĩ kĩrĩa athamaki a Juda mageraga magĩtonya itũũra-inĩ, o na makiumagara moime na nja, o na ningĩ ũrũgame ihingo-inĩ ciothe cia Jerusalemu,
20ũmere atĩrĩ, Ta iguai ndũmĩrĩri ya Jehova, inyuĩ athamaki a Juda, na inyuĩ andũ othe a Juda, o na inyuĩ inyuothe mũtũũraga Jerusalemu, o inyuĩ mũtonyagĩra ihingo-inĩ ici;
21Jehova ekuuga ũũ: Atĩrĩrĩ, wĩmenyererei mũtigatitike mũrigo mũthenya wa thabatũ, o na kana mũũtonyie ihingo cia Jerusalemu;
22o na kana mũtitike mũrigo mũũrute nyũmba-inĩ cianyu mũthenya wa thabatũ, o na kana mũrute wĩra o na ũrĩkũ; no rĩrĩ, mũthenya ũcio wa thabatũ-rĩ, wamũragei, o ta ũrĩa ndaathanire gwĩkagwo nĩ maithe manyu;
23no rĩrĩ, matiigana kũigua, o na kana matege gũtũ, no nĩ kũũmia momirie ciongo ciao, nĩ getha matikananjigue, o na nĩ getha matikae gũtaarũo.
24Ningĩ Jehova ekuuga atĩrĩ, atĩ mũngĩkanjigua na kĩyo, na mũtikanatitike mũrigo mũkĩũroria ihingo-inĩ cia itũũra rĩrĩ mũthenya wa thabatũ, no mwamũre mũthenya ũcio wa thabatũ mũũtherie, mũtige kũruta wĩra o na ũrĩkũ mũthenya ũcio-rĩ,
25hĩndĩ ĩo nĩguo ihingo cia itũũra rĩrĩ igatonyagĩrũo nĩ athamaki na anene a gũikarĩra gĩtĩ kĩa ũnene kĩa Daudi, nao matonye mahaicĩte ngari, na mbarathi, o ene, o na anene ao, me hamwe na andũ a Juda, o na andũ arĩa matũũraga Jerusalemu, narĩo itũũra rĩrĩ nĩrĩgũtũũrũo nĩ andũ nginya tene na tene.
26Nao andũ nĩmagoka moimĩte matũũra ma Juda, o na makoima kũndũ guothe ndere-inĩ cia Jerusalemu, o na moime bũrũri wa Benjamini, o na bũrũri ũrĩa mũgũu, o na moime irĩma-inĩ, o na moime bũrũri wa Gũthini, marehe indo cia mahaki ma njino, o na magongona mangĩ, o na indo ingĩ cia kũrutwo, na ũbumba; nao marehe indo cia gũcokia ngatho nacio, maciige o kũu nyũmba ya Jehova.
27No rĩrĩ, mũngĩrega kũnjigua mwage kwamũra mũthenya ũcio wa thabatũ mũũtherie, nĩguo mũtigatitike mũrigo mũtonyere ihingo-inĩ cia Jerusalemu mũthenya wa thabatũ-rĩ, hĩndĩ ĩo nĩngamundia ihingo icio ciarĩo mwaki, naguo ũcine nyũmba cia athamaki a Jerusalemu ũcinine biũ; na ndũkahoreka.
Sign in to highlight verses and keep them in sync with the mobile app.