← All books
AMPKIKUYUKJVNIVNKJVNLTNRSV
1NINGĨ Jehova agĩcoka akiuga ũũ: Ta thiĩ ũkagũre gatigithũ ka rĩũmba he mũũmbi, ũcoke woe athuri a kĩrĩndĩ na athuri a athĩnjĩri-Ngai,
2mũcoke muumagare mũkinye gĩtuamba kĩa mũrũ wa Hinomu, kĩrĩa gĩkuhĩhĩirie itonyero rĩa kĩhingo kĩrĩa gĩĩtagwo Kĩhingo kĩa Ngĩo, ũhunjanĩrie ũhoro ũrĩa ngũkwĩra,
3uuge ũũ: Ta thikĩrĩriai ũhoro wa Jehova, inyuĩ athamaki aya a Juda, o na inyuĩ mũtũũraga Jerusalemu Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, kũndũ gũkũ nĩngakũrehithĩrie ũũru, na mũndũ o wothe ũrĩa ũkaũigua nĩakararakwo nĩ matũ.
4Nĩ ũndũ nĩmandirikĩte na magathahia handũ haha, tondũ nĩho macinĩire ngai ingĩ ũbumba, o ngai iria mataamenyete, o ene o na kana maithe mao, o na kana athamaki a Juda; nakuo kũndũ gũkũ magakũiyũria thakame ya andũ arĩa matarĩ na ũũru mekĩte.
5O na ningĩ magagwaka matĩri ma kũndũ gũtũũgĩru ma kũhoerũo Baali, macinagĩre ariũ ao na mwaki kuo mamatuĩte mahaki ma njino ma gũcinĩrũo Baali; naguo ũndũ ũcio nĩ ũrĩa itaathanire wĩkwo, kana ngĩaria ũhoro waguo, o na kana ũkĩngĩa ngoro.
6Na atĩrĩrĩ, tondũ wa ũhoro ũcio Jehova ekuuga ũũ: Atĩrĩrĩ, matukũ nĩmagoka marĩa kũndũ gũkũ gũtagacoka gwĩtwo Tofethi, o na kana Gĩtuamba kĩa mũrũ wa Hinomu, no gwĩtagwo ũũ: Gĩtuamba kĩa Rĩũraganĩro.
7Gũkũ nĩkuo ngathatĩria matanya ma andũ a Juda na Jerusalemu, na nĩngatũma magũe moragĩtwo na hiũ cia njora cia thũ ciao, na moragwo na guoko kwa andũ arĩa macaragia kũanaruta muoyo; nacio ciimba ciao ndĩcineane harĩ nyamũ cia rĩera-inĩ ituĩke nyama ciacio, o na ndĩcineane harĩ nyamũ cia gĩthaka cia gũkũ thĩ
8Narĩo itũũra rĩrĩ nĩngatũma rĩtuĩke o ta kĩndũ gĩa kũgegania, o na gũtũũre kuugagwo atĩrĩ, Hi-i-i! Na rĩrĩ, mũndũ o mũndũ ũrĩa ũkahĩtũkagĩra kuo nĩ kũgega akagega oige, Hi-i-i! nĩ ũndũ wa ũrĩa rĩgakorũo rĩhũrĩtwo.
9Niĩ na niĩ nĩngatũma marĩe nyama cia mĩĩrĩ ya ariũ ao, o na ya airĩtu ao, nake mũndũ o mũndũ arĩe nyama ya mwĩrĩ wa mũratawe kũu magakorũo mahingĩrĩirio itũũra-inĩ nĩ mũtharĩko, na me na mĩnyarirĩko mĩnene, ya thũ ciao, o na ya andũ arĩa macaragia kũanaruta muoyo.
10Ningĩ hĩndĩ ĩo ũkĩũrage gatigithũ kau, o ũkĩonagwo nĩ andũ arĩa mũgakorũo mũtwaranĩte nao,
11ũkĩmere atĩrĩ, Jehova Mũnene wa Ita ekuuga ũũ: Ũguo noguo ngathuthanga andũ aya, o na itũũra rĩrĩ rĩao, o ta ũrĩa mũndũ oragaga nyũngũ ya mũũmbi, ĩrĩa ĩtangĩcoka gũthondekeka ĩtuĩke ng’ima rĩngĩ; nao magathikana gũkũ Tofethi o nginya kwage handũ ha gũcoka gũthikanwo.
12Ũguo nĩguo ngeka kũndũ gũkũ, o na andũ arĩa magũtũũraga, o nginya kũhaane o ta Tofethi; ũguo nĩguo Jehova ekuuga.
13Nacio nyũmba cia Jerusalemu, o na nyũmba cia athamaki a Juda, icio mathahĩtie, igatuĩka o ta kũndũ kũu Tofethi, naguo ũguo nĩ ta kuuga nyũmba ciothe iria macinĩire ũbumba igũrũ, makaũcinĩra mbũtũ ciothe cia njata, o na magaitĩra ngai ingĩ mahaki ma indo cia kũnyuwo.
14Thutha wa ũguo Jeremia akĩinũka oimĩte Tofethi, o kũu Jehova aamũreketie akarathĩre mohoro kuo; nake agĩkĩrũgama nja ya nyũmba ya Jehova, akĩĩra andũ othe atĩrĩ,
15Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, nĩngarehithĩrie itũũra rĩrĩ, o na tũtũũra tũrĩa tũngĩ twarĩo tuothe, ũũru wothe ũrĩa ndĩrĩgweteire, nĩ gũkorũo andũ arĩo nĩmomĩtie ciongo nĩ getha matikaigue ndũmĩrĩri ciakwa.
Sign in to highlight verses and keep them in sync with the mobile app.