← All books
AMPKIKUYUKJVNIVNKJVNLTNRSV
1ATĨRĨRĨ, ĩno nĩyo ndũmĩrĩri ĩrĩa yakinyĩrĩire Jeremia ĩkoniĩ andũ othe a Juda, mwaka wa ĩna ĩrĩa Jehoiakimu, mũrũ wa Josia, mũthamaki wa Juda, aakorirũo athamakĩte; na nĩngĩ noguo warĩ mwaka wa mbere ũrĩa Nebukadirezaru, mũthamaki wa Babuloni, aakorirũo athamakĩte;
2nayo nĩyo Jeremia ũcio warĩ mũnabii aaririe na andũ othe a Juda, o na andũ othe arĩa maatũũraga Jerusalemu, akiuga atĩrĩ,
3Kuuma mwaka wa ikũmi na ĩtatũ ĩrĩa Josia, mũrũ wa Amoni, mũthamaki wa Juda, aakorirũo athamakĩte, o nginya mũthenya ũyũ wa ũmũthĩ, mĩaka ĩno mĩrongo ĩĩrĩ na ĩtatũ-rĩ, ndũire nginyagĩrĩrũo nĩ ndũmĩrĩri cia Jehova; niĩ na niĩ-rĩ, ngacoka ngamũhe ũhoro wacio ndokete gũũkĩra rũcinĩ tene ndĩciarie, no mũkarega kũigua.
4Ningĩ Jehova agatũũra amũrekagĩria ndungata ciake ciothe cia anabii, ta arĩ kũroka arokete gũũkĩra rũcinĩ tene acirekie; no mũtiigana kũigua, o na kana mũgĩtega matũ manyu nĩguo mũmũthikĩrĩrie,
5o rĩrĩa oigaga atĩrĩ, Rĩu garũrũkai, mũndũ o mũndũ atigane na mĩthiĩre yake mĩũru, na mũtigane na ũũru wa ciĩko cianyu, nĩguo mũtũũre bũrũri ũyũ Jehova aamũheire inyuene, o na maithe manyu, ũtuĩke wanyu kuuma o tene o na nginya mĩndĩ na mĩndĩ;
6na mũtikanagarũrũkĩre ngai ingĩ mũcitungatĩre, o na kana mũciinamĩrĩre mũcihoe; ningĩ mũtikanandakarie na ũndũ wa maũndũ marĩa mwĩthondekagĩra na moko manyu; niĩ na niĩ-rĩ, ndirĩ hĩndĩ ngamũgerithia ngero.
7No rĩrĩ, o na gwatuĩka nĩ ũguo-rĩ, mũtinjiguĩte; nĩ getha mũ’thirĩkie mũtũme ndakare na ũndũ wa maũndũ marĩa mwĩthondekagĩra na moko manyu, nĩ getha mwĩgerithie ngero o ro ũguo; ũguo nĩguo Jehova ekuuga.
8Tondũ ũcio Jehova Mũnene wa Ita ekuuga ũũ: Kuona atĩ nĩmũregete kũigua ũhoro wakwa-rĩ,
9atĩrĩrĩ, nĩ kũrekania ngarekania ’nyitithie andũ othe a mbarĩ cia mwena wa gathigathini, ningĩ ndũmane kwa Nebukadirezaru, mũthamaki wa Babuloni, o we ndungata yakwa, ndĩmarehithie matharĩke bũrũri ũyũ, o na mokĩrĩre andũ arĩa maũtũũraga, o na ndũrĩrĩ ciothe iria iũrigicĩirie; ũguo nĩguo Jehova ekuuga; na nĩngamanina biũ, o na ndũme matuĩke ta ũndũ wa kũgegania, o na wa gũtũma kuugagwo atĩrĩ, Hi-i-i! Ningĩ kũndũ gũkũ gũtũũre gũkirĩte ihooru nginya tene na tene.
10O na ningĩ atĩrĩ, nĩngamehereria mũgambo wa mĩtheko o na wa gĩkeno, naguo mũgambo wa mũhikania, o na wa mũhikio, o na ndĩmehererie mũrurumo wa mahiga ma ithĩi, o na ũtheri wa tawa.
11Naguo bũrũri ũyũ wothe nĩũgakira ihooru, o na ũtuĩke ta ũndũ wa kũgegania; nacio ndũrĩrĩ ici nĩigatungatĩra mũthamaki wa Babuloni mĩaka mĩrongo mũgwanja.
12Na nĩgũgakinya atĩrĩ, atĩ mĩaka mĩrongo mũgwanja yathira, nĩngaherithia mũthamaki wa Babuloni, o na ’herithie rũrĩrĩ rũu ruothe nĩ ũndũ wa ũũru waruo; ũguo nĩguo Jehova ekuuga; o na ’herithie bũrũri wa Akalidei, ndũme ũkire ihooru nginya tene na tene.
13Namo mohoro makwa marĩa ndaaririe makoniĩ bũrũri ũcio-rĩ, nĩngaũhingĩria, ndĩũhingĩrie maũndũ mothe marĩa maandĩkĩtwo ibuku-inĩ rĩrĩ, o macio Jeremia arathĩte ũhoro wamo makoniĩ ndũrĩrĩ icio ciothe.
14Nĩ gũkorũo ndũrĩrĩ nyingĩ o na athamaki anene nĩmakamatua ngombo ciao, na niĩ nĩngamagera ngero iringaine na ciĩko icio ciao, o na iria iringaine na maũndũ marĩa maaneka na moko mao o ene.
15Nĩ ũndũ Jehova Ngai wa Isiraeli anjĩrĩte atĩrĩ, Oya gĩkombe gĩkĩ kĩa ndibei, o gĩkĩ ndĩ nakĩo guoko kĩa mang’ũrĩka makwa, ũtũme ndũrĩrĩ ciothe cia kũrĩa ngakũrekia ikĩnyuĩre.
16Nacio nĩikanyua icoke ĩtũgũge na igũrũke, nĩ ũndũ wa rũhiũ rũa njora rũrĩa ngacitwarithĩria.
17Hĩndĩ ĩo na niĩ ngĩkĩoya gĩkombe kĩu kĩarĩ guoko-inĩ kwa Jehova, ngĩkundia ndũrĩrĩ ciothe, icio Jehova aandeketie harĩ cio,
18naguo ũguo nĩ ta kuuga Jerusalemu, o na matũũra ma Juda, o na athamaki akuo, o na anene akuo, nĩguo gũtũũre gũkirĩte ihooru, o na gũtuĩke ta ũndũ wa kũgegania, o na ũndũ wa gũtũma gũtũũre kuugagwo, Hi-i-i! o na gũtũũre kũgwatĩtwo nĩ kĩrumi, o ta ũũ gũtariĩ ũmũthĩ.
19Na ningĩ ngĩkundia Firauni, mũthamaki wa Misiri, o na ndungata ciake, na anene ake, o na andũ ake othe;
20o na andũ a ndũrĩrĩ iria thombocanu; o na athamaki othe a bũrũri wa Uzu, o na athamaki othe a bũrũri wa Afilisiti, naguo ũguo nĩ ta kuuga Ashikeloni, na Gaza, na Ekironi, o na matigari ma andũ a Ashidodi;
21ningĩ ngĩkundia Edomu, na Moabi, na ciana cia Amoni,
22o na athamaki othe a Turo, o na athamaki othe a Zidoni, o na athamaki a gĩthama kĩrĩa kĩrĩ mũrĩmo ũrĩa ũngĩ wa iria;
23na Dedani, na Tema, na Buzu, o na arĩa othe matuagĩrĩrũo;
24o na athamaki othe a bũrũri wa Arabia, na athamaki a andũ a ndũrĩrĩ iria thombocanu itũũraga werũ-inĩ;
25o na athamaki othe a Zimuri, o na athamaki othe a Elamu, o na athamaki othe a Amedi,
26o na athamaki othe a gathigathini, arĩa maraihanĩrĩirie, o na arĩa makuhanĩrĩirie, o mũndũ na mũndũ ũrĩa ũngĩ; o na kũndũ guothe thĩ kũrĩa gũthamakagwo nĩ athamaki, o arĩa makoragwo thĩ yothe. Na rĩrĩ, mũthamaki wa Babuloni agakĩnyuĩra thutha wao.
27Nawe ũkamera atĩrĩ, Jehova Mũnene wa Ita, o we Ngai wa Isiraeli, ekuuga ũũ: Nyuai, mũrĩwo na mũtahĩke, mũcoke mũgũe na mũtikanacoke gũũkĩra, nĩ ũndũ wa rũhiũ rũa njora rũrĩa ngarehithie thĩinĩ wanyu.
28Na nĩgũgakinya atĩrĩ, atĩ mangĩkarega kuoya gĩkombe kĩu guoko-inĩ gwaku makĩnyuĩre-rĩ, nĩũgakĩmera atĩrĩ, Jehova Ngai Mũnene wa Ita ekuuga ũũ: Ti-itherũ mũtirĩ hingo mũtakanyua.
29Nĩ ũndũ nyambĩrĩirie kũgerana ngero o itũũra-inĩ rĩrĩa rĩĩtanĩtio na rĩĩtwa rĩakwa, na rĩrĩ, anga inyuĩ mwakĩaga kũherithio o na atĩa? Mũtirĩ hingo mũkaaga kũherithio, nĩ ũndũ nĩ gwĩta ngero rũhiũ rũa njora rũkore andũ othe arĩa matũũraga thĩ; ũguo nĩguo Jehova Mũnene wa Ita ekuuga.
30Tondũ ũcio marathĩre mohoro maya mothe, ũmere atĩrĩ, Jehova agatharuma arĩ o kũu igũrũ, na oigĩrĩrie na mũgambo mũnene arĩ gĩikaro-inĩ gĩake kĩrĩa gĩtheru mũno, na atharumĩre ũrĩithio wake na hinya mũno, aanĩrĩre na mũgambo mũnene mũno o ta andũ arĩa marangaga thabibu, nĩ ũndũ wa andũ othe arĩa matũũraga thĩ.
31Inegene rĩu rĩgakinya o ituri-inĩ cia thĩ; nĩ ũndũ Jehova e na ngarari na ndũrĩrĩ, na akagĩa na cira na andũ othe; nao arĩa aaganu nĩ kũneana akamaneana maninwo na rũhiũ rũa njora; ũguo nĩguo Jehova ekuuga.
32Jehova Mũnene wa Ita ekuuga ũũ: Atĩrĩrĩ, ũũru ũkoima rũrĩrĩ-inĩ rũmwe ũkinyĩre rũrĩrĩ rũrĩa rũngĩ, nakĩo kĩhuhũkanio kĩnene kĩa rũhuho kĩhuhũkanio kiumĩte ituri-inĩ cia thĩ, o mĩthia-inĩ yakuo.
33Nao andũ arĩa moragithĩtio nĩ Jehova mũthenya ũcio magakorũo magũĩte thĩ kwarũma o gĩturi kĩmwe kĩayo o nginya kĩrĩa kĩngĩ; matikarĩrĩrũo kana monganio, o na kana mathikwo; magatuĩka o ta thumu gũkũ thĩ guothe.
34Atĩrĩrĩ, inyuĩ arĩithi aya, ta gĩkaei, na mũrĩre na kĩgi, o na mwĩgaragarie mũhu-inĩ inyuĩ anene a rũũru rũa mbũri; nĩ ũndũ mĩthenya yanyu ya kũũragwo nĩ mĩkinyu o gũkinya, na nĩngũmũhehenja, mũgũe thĩ o ta kĩndũ kĩrĩa kĩendeku mũno.
35Nao arĩithi matikona njĩra ya kũũrĩra, o na kana anene a rũũru rũa mbũri mahonoke.
36Mũgambo wa kĩrĩro kĩa arĩithi, o na mũkayo wa anene a rũũru rũa mbũri-rĩ, hĩ, nĩũraiguwo-ĩ! Nĩ ũndũ Jehova nĩaraanangithia ũrĩithio wao o kũwanangithia biũ.
37O naguo ũrĩithio ũrĩa ũtararĩ na ũgwati nĩ gũkira ũkirĩte ihooru nĩ ũndũ wa marakara marĩa manene ma Jehova.
38Nĩ kuumagara oimagarĩte ta mũrũthi ũkiuma kĩmamo-inĩ kĩaguo, nĩ gũkorũo bũrũri wao nĩũtuĩkĩte o ta ũndũ wa kũgegania, nĩ ũndũ wa ũrĩa rũhiũ rũa njora rũhinyanĩrĩirie, o na ũndũ wa marakara make meĩ mũno.
Sign in to highlight verses and keep them in sync with the mobile app.