← All books
AMPKIKUYUKJVNIVNKJVNLTNRSV
1Na gũgĩkinya atĩrĩ, atĩ mwaka o ro ũcio, hĩndĩ ĩrĩa Zedekia, mũthamaki wa Juda, aambĩrĩirie gũthamaka, o mwaka wa ĩna na mweri wa ĩtano-rĩ, Hanania wa Azuru, mũnabii ũrĩa warĩ wa Gibeoni, akĩnjarĩria tũrĩ o kũu nyũmba ya Jehova, athĩnjĩri-Ngai o na andũ arĩa angĩ othe marĩ ho; akĩnjĩra atĩrĩ,
2Jehova Mũnene wa Ita, o we Ngai wa Isiraeli, nĩaarĩtie akoiga ũũ: Atĩrĩrĩ, mũtĩ wa ngingo wa mũthamaki wa Babuloni nĩndĩuunangĩte.
3Mĩaka iĩrĩ mĩgima yathira-rĩ, nĩngacokithia indo ciothe cia nyũmba ya Jehova kũndũ gũkũ, iria Nebukadinezaru, mũthamaki wa Babuloni, aathiire nacio agĩciruta gũkũ, agĩcitwara Babuloni;
4o nake Jekonia, mũrũ wa Jehoiakimu, mũthamaki wa Juda, nĩngamũcokia gũkũ, me hamwe na andũ othe a Juda arĩa maatahirũo magĩthiĩ Babuloni; ũguo nĩguo Jehova ekuuga; nĩ ũndũ nĩngoinanga mũtĩ wa ngingo wa mũthamaki ũcio wa Babuloni.
5Hĩndĩ ĩo Jeremia, ũcio mũnabii, akĩarĩria Hanania, mũnabii, athĩnjĩri-Ngai marĩ ho, o na andũ arĩa angĩ othe, acio maarũngiĩ kũu nyũmba ya Jehova.
6Nake Jeremia, ũcio mũnabii, akiuga atĩrĩ, Amen; Jehova aroeka ũndũ ũcio! Jehova arohingia ũhoro waku ũcio ũrathĩte wa gũcokithia indo cia nyũmba ya Jehova, o na wa gũcokithia andũ othe arĩa maatahirũo, nĩguo marutwo kũu Babuloni marehwo gũkũ.
7No rĩrĩ, rĩu ta thikĩrĩria ũhoro ũyũ ngwaria ũkĩĩiguagĩra na matũ, o na andũ aya othe nao makĩĩiguagĩra.
8Atĩrĩrĩ, anabii arĩa maarĩ mbere yakwa o na mbere yaku o tene-rĩ, nĩmaarathire mohoro makoniĩ mabũrũri maingĩ, o na mothamaki me hinya, makĩgweta ũhoro wa mbaara, o na ũũru, o na wa mũthiro.
9No rĩrĩ, mũnabii ũrĩa ũrathaga ũhoro wa atĩ nĩgũkũgĩa thayũ-rĩ, hĩndĩ ĩrĩa ũhoro wa mũnabii ũcio ũkahingio, noguo gũkamenyeka atĩ ti-itherũ nĩ Jehova wamũrekirie.
10Hĩndĩ ĩo Hanania akĩruta Jeremia mũtĩ wa ngingo akĩuunanga.
11Nake Hanania agĩcoka akĩarĩria hau andũ othe marĩ ho, akiuga atĩrĩ, Jehova ekuuga ũũ: Atĩrĩrĩ, ũguo noguo ngoinanga mũtĩ wa ngingo wa Nebukadinezaru, mũthamaki wa Babuloni, mĩaka ĩĩrĩ yathira, uume ngingo cia andũ a ndũrĩrĩ ciothe. Nake Jeremia mũnabii agĩĩthiĩra.
12Na rĩrĩ, mũnabii Hanania aarĩkia kuunanga mũtĩ ũcio wa ngingo warĩ ngingo ya Jeremia ũrĩa mũnabii, ndũmĩrĩri ya Jehova ĩgĩcoka ĩgĩkinyĩrĩra Jeremia, akĩĩrũo atĩrĩ,
13Thiĩ ũkaarie na Hanania ũmwĩre atĩrĩ, Jehova ekuuga ũũ: Atĩrĩrĩ, wee nĩ kuuna woinanga mũtĩ ũcio wa ngingo wa mbaũ; no rĩrĩ, ithenya rĩaguo-rĩ, nĩ gũtura ũturithĩtie mĩtĩ ĩngĩ ya ngingo ya kĩgera.
14Nĩ gũkorũo Jehova Mũnene wa Ita, o we Ngai wa Isiraeli, ekuuga ũũ: Ndũrĩrĩ ici ciothe nĩndĩciĩkĩrĩte mũtĩ wa ngingo wa kĩgera, nĩ getha itungatĩre Nebukadinezaru, mũthamaki wa Babuloni; nacio itirĩ hingo itakamũtungatĩra; o na ningĩ nĩndĩmũheete nyamũ cia gĩthaka o nacio.
15Hĩndĩ ĩo Jeremia, ũcio mũnabii, agĩgĩcoka akĩĩra Hanania ũũ: Rĩu, wee Hanania, ta thikĩrĩria; Jehova ndakũreketie, no nĩ gũtũma ũtũmĩte andũ aya mehoke ũhoro wa maheni.
16Tondũ ũcio Jehova ekuuga ũũ: Atĩrĩrĩ, nĩngũkweheria uume gũkũ thĩ, naguo mwaka o ro ũyũ nĩguo ũgakua, nĩ gũkorũo nĩwarĩtie maũndũ ma kũrega watho wa Jehova.
17Nake Hanania, ũcio mũnabii, agĩgĩkua mwaka o ro ũcio, mweri wa mũgwanja.
Sign in to highlight verses and keep them in sync with the mobile app.