← All books
AMPKIKUYUKJVNIVNKJVNLTNRSV
1Atĩrĩrĩ, Isiraeli, Jehova ekuuga ũũ: Ũngĩkorũo nĩũkũhũndũka-rĩ, hũndũka o harĩ niĩ; o na nĩngĩ ũngĩkorũo nĩũgũtiga maũndũ maku marĩa waneka ma thahu ndige gũcoka kũmona, na ũtige kũũrũra;
2o na ningĩ ũcoke kwĩhĩta ũkiugaga ũũ: O ta ũrĩa Jehova atũũraga muoyo, ũrũmĩtie ũhoro-wa-ma, na ũtuanĩri cira na kĩhooto, o na ũkarũmia maũndũ ma ũthiagu-rĩ, rĩu nĩrĩo ihinda rĩrĩa andũ a ndũrĩrĩ makerathimaga megiritanĩtie nake, na merahage nĩ ũndũ wake.
3Nĩ gũkorũo Jehova ekwĩra andũ a Juda o na a Jerusalemu ũũ: Atĩrĩrĩ, tukuyai ngamba, na mũtikahande irio mĩigua-inĩ.
4Wĩamũrĩrei Jehova na ũndũ wa kwĩruithia ngoro cianyu, inyuĩ andũ aya a Juda, o na inyuĩ mũtũũraga Jerusalemu, nĩ getha mang’ũrĩka makwa matikarĩrĩmbũke ta mwaki, namo macinane o nginya kwage wa kũmahoria, nĩ ũndũ wa ũũru wa ciĩko cianyu.
5Hunjanĩriai ũhoro kũu Juda, na mũũmemerekie kũu Jerusalemu, mũkiugaga atĩrĩ, Huhai tũrumbeta kũu bũrũri-inĩ, na mwanĩrĩre mũno, muuge atĩrĩ, Wĩcokanĩrĩriei hamwe nĩguo tũthiĩ tũtonye matũũra marĩa mairigĩtwo.
6Handai kĩbebero na kũu Zayuni, nĩ getha andũ methare morĩre kuo, nĩguo mahonoke; nĩ ũndũ-rĩ, ngarehithie ũũru uumĩte na mwena wa gathigathini, o na kũninanwo kũnene mũno.
7Mũninani wa kũninũkia ndũrĩrĩ nĩ mũthecu njĩra, akoimagara oimĩte handũ hake, atariĩ ta mũrũthi warahũkĩte ũkoima kĩmamo-inĩ kĩaguo. Nake egũũka atũme bũrũri waku ũkire ihooru, o na matũũra maku maanangĩke, matige gũcoka gũtũũrũo nĩ andũ.
8Tondũ wa ũguo wĩohei tama wa ikũnia, mwĩhũre ithũri nĩ kĩeha, na mũrĩre na kĩgi; nĩ ũndũ tũtirĩ tũrehererio marakara marĩa meĩ ma Jehova.
9Na nĩgũgakinya atĩrĩ, mũthenya ũcio, atĩ mũthamaki agaikara ta akuĩte ngoro, we mwene o na anene ake othe, nao athĩnjĩri-Ngai magegeare, nao anabii mamake.
10Hĩndĩ ĩo niĩ na niĩ ngiuga atĩrĩ, Hĩ! Mwathani Jehova, ti-itherũ nĩ ta kũhenia ũhenetie andũ aya mũno, o aya a Jerusalemu, ũkiuga atĩrĩ, Nĩmũkagĩa na thayũ, na nĩ hĩndĩ ĩrĩa rũhiũ rũa mbaara rũmakinyĩrĩire, rũkamamunda ngoro.
11Ningĩ mũthenya ũcio andũ aya a Jerusalemu makerũo atĩrĩ, Rũhuho rũhiũ ruumĩte kũndũ kũrĩa gũtigĩtwo ũtheri tũcũmbĩrĩ-inĩ twa irĩma iria irĩ werũ-inĩ rũkahurutanĩra mwarĩ wa andũ akwa, no ti ta rũa kũhuha irio o na kana gũcitheria,
12tondũ rũkoima kuo rũkĩhurutana na hinya mũkĩru, nĩ ũndũ nĩ niĩ ngatũma rũhurutane ũguo. Niĩ rĩu ngũgweta ituĩro rĩrĩa ngũmatuĩra.
13Atĩrĩrĩ, mũndũ ũcio egũũkĩra ta matu, nacio ngari ciake cia ita itariĩ o ta kĩhuhũkanio kĩnene kĩa rũhuho; ningĩ mbarathi ciake igĩĩte ihenya igakĩria nderi. Wũi-ĩiya-witũ-ĩ! Nĩ ũndũ tũrĩ anine.
14Atĩrĩrĩ, wee Jerusalemu, theria ngoro yaku ũthirũo nĩ waganu, nĩ getha ũhonokio. Kaĩ ũũru wa meciria maku ũgũgũtũũrĩrĩra nginya hĩndĩ ĩ?
15Atĩrĩrĩ, he mũgambo wa mũndũ ũraheana ũhoro o kũu Dani, na ũkahunjanĩria ndeto cia mũtino ũrĩa wonekete ithũngũri-inĩ cia Efiraimu.
16Ta kĩmemerekeriei ndũrĩrĩ mohoro macio; na ningĩ mũhunjĩrie Jerusalemu ũhoro wa atĩ atharĩki maroka moimĩte bũrũri wa kũraya, nao nĩ kũrũhia mararũhĩria matũũra ma Juda.
17Nĩmarigicĩirie itũũra na mĩena yothe, ta andũ megũikaria mũgũnda, nĩ ũndũ rĩtũire rĩnemete rĩkanjũkĩrĩra; ũguo nĩguo Jehova ekuuga.
18Mĩthiĩre yaku na ciĩko ciaku nĩcio ikũrehereire maũndũ macio, tondũ nĩmo moimanĩte na waganu waku. Kaĩ waganu ũcio waku nĩ mwĩhu, na ũgagũthũkia ngoro-ĩ!
19Wũi nda, wũi nda yakwa-ĩ! Nĩ gũtuurũo ngũtuurũo o ngoro thĩinĩ, ningĩ ngoro yakwa nĩ gũikaikanĩa ĩraikaikania. Ndingĩhota gũkirĩrĩria, nĩ ũndũ ngoro yakwa nĩĩiguĩte mũgambo wa karumbeta o na rũũhiũ rũa ita.
20Kũraanĩrĩrũo ũhoro wa ũrĩa kũraninanwo gũtegũtigithĩrio, nĩ gũkorũo bũrũri wothe nĩ mwanange. Onei ũrĩa hema ciakwa itembũrangĩtwo o narua gũtehaarĩirio, o nacio ciandarũa igaatũrangwo njaaga kahinda kanini.
21Rĩu-rĩ, ngũtũũra nyonaga kĩbebero gĩa ita nginya hĩndĩ ĩ, na ngaigua mũgambo wa karumbeta?
22Nĩ ũndũ-rĩ, andũ akwa nĩ akĩgu, na matinjũĩ; nĩ ciana ngingitanu, na itirĩ na ngoro nguũku; nĩciũhĩgĩrĩire gwĩka ũũru, no ha ũhoro wa gwĩka maũndũ mega-rĩ, itirĩ kaũũgĩ o na kanini.
23Ndacũthĩrĩirie thĩ-ĩ, ngĩkĩona atĩ ndĩrĩ ũrĩa ĩrĩ, kana ĩkagĩa kĩndũ o na kĩ; ningĩ ngĩcũthĩrĩria matu-inĩ igũrũ-ĩ, ngĩona atĩ gũtirĩ na ũtheri.
24Ngĩcoka ngĩcũthĩrĩria irĩma, ngĩona atĩ nĩ kũinaina ikũinaina, o nacio ithũngũri ciothe nĩ gũthingitha irathingitha.
25Ningĩ ngĩcũthĩrĩria, ngĩona atĩ gũtirĩ mũndũ o na ũmwe wĩ kuo, o nacio nyoni ciothe cia rĩera-inĩ nĩ kũũra ciũrĩte.
26Ngĩcoka ngĩcũthĩrĩria, ngĩona atĩ mũgũnda ũrĩa ũciaraga maciaro maingĩ nĩũtuĩkĩte o ta werũ mũtheri, o namo matũũra mothe ma thĩ nĩmamomokeire mbere ya Jehova makagũa thĩ, ta magũithĩtio nĩ marakara make marĩa meĩ mũno.
27Nĩ ũndũ Jehova nĩatuĩte ũũ: Atĩrĩrĩ, thĩ yothe nĩ gũkira ĩgakira ihooru, no rĩrĩ, o na kũngĩtuĩka nĩ ũguo-rĩ, ndĩkamĩninũkĩrĩria biũ.
28Tondũ wa maũndũ macio-rĩ, thĩ yothe nĩ kũrĩra ĩkarĩra na kĩgi, o namo matu ma na kũrĩa igũrũ mathimbe o gũthimba; nĩ gũkorũo ũhoro wa ũrĩa ndanyĩte nĩndĩwarĩtie, na ndĩĩricũkĩtwo, o na ndigatiga kũũhingia.
29Ta kĩonei ũrĩa andũ a itũũra o rĩothe marora maaigua mũrurumo wa andũ arĩa megũũka mahaicĩte mbarathi, na wa mbũtũ cia andũ arĩa maikagia mĩguĩ; marora magathiĩ kwĩhitha ihinga-inĩ, o na makahaica ndwaro-inĩ cia mahiga; matũũra mothe nĩmathamĩtwo, na gũtirĩ mũndũ o na ũmwe ũtũũraga kuo.
30Wee nawe-rĩ, gwaku kwaanangĩka-rĩ, ũgagĩĩka atĩa? O na harĩa ũtũire wĩhumbaga nguo ndune, na ũkegemia na mathaga ma thahabu, na ũkehaka mbiro mbutu-inĩ cia maitho-rĩ, kwĩgemia kũu guothe rĩu nĩ gwa tũhũ, amu anyanya aku nĩmagũũkĩrĩire makũmenererie, na nĩ gũcaria maracaria njĩra ya gũkũruta muoyo.
31Nĩ ũndũ nĩnjiguĩte mũgambo ta wa mũndũ-wa-nja ũkũrũmwo, o na ngaigua mũcayo ta wa mũndũ-wa-nja ũkũrigithatha, naguo nĩ wa mwarĩ wa Zayuni, agĩtehũka atambũrũkĩtie moko, akiugaga atĩrĩ, Wũi-ĩ-iya-wakwa-ĩ! Amu nĩ kũhũa ’hũĩte ngoro, ndĩ mũringĩku nĩ ũndũ wa gũkorererũo nĩ oragani.
Sign in to highlight verses and keep them in sync with the mobile app.