← All books
AMPKIKUYUKJVNIVNKJVNLTNRSV
1NA gũgĩkinya atĩrĩ, atĩ Jesu aarĩkia kũheana ũhoro ũcio, akiuma Galili, agĩkinya ndere-inĩ cia Judea, mũrĩmo ũrĩa ũngĩ wa Jorodani;
2na kĩrĩndĩ kĩingĩ gĩkĩmũhikĩra, nake akĩmahoneria kuo.
3Na Afarisai amwe magĩũka kũrĩ we makĩmũgeria, makĩmũũria atĩrĩ; Nĩkwagĩrĩire mũndũ ate mũtumia wake nĩ ũndũ wa gĩtũmi o na kĩrĩkũ?
4Nake agĩcokia ũhoro akĩmoria atĩrĩ, Kaĩ mũtathomete atĩ, Ũrĩa wombire andũ gwata kĩambĩrĩria, aamombire marĩ mũndũ mũrũme na mũndũ mũka,
5na akiuga atĩrĩ, Nĩ ũndũ ũcio mũndũ mũrũme nĩagatigana na ithe na nyina, magwatane na mũtumia wake; nao erĩ matuĩke mwĩrĩ ũmwe?
6Tondũ wa ũguo matigacoka gũtuĩka erĩ, no mwĩrĩ ũmwe. Nĩ ũndũ ũcio-rĩ, arĩa Ngai agwatanĩtie mũndũ ndakanamatigithanie.
7Nao makĩmũũria; Nĩ kĩ gĩagĩtũmire Musa aathane atĩ mũndũ ahe mũtumia wake marũa ma gũtigana nake, amũte?
8Nake akĩmera, Musa aamwĩtĩkĩririe mũteage atumia anyu nĩ ũndũ wa ũrĩa ngoro cianyu ciũmĩte; no rĩrĩ, kuuma kĩambĩrĩria gũtiatariĩ ũguo.
9Na ngũmwĩra atĩrĩ, Mũndũ o wothe ũngĩte mũtumia, tiga o ũndũ wa ũtharia, na ahikie ũngĩ, gũtharia nĩatharĩtie: na ũrĩa ũngĩmũhikia, hĩndĩ ĩo ateetwo, ũcio nĩatharĩtie o nake.
10Nao arutwo ake makĩmwĩra; Ũhoro wa mũndũ na mũtumia wake ũngĩkorũo ũtariĩ ũguo, kaĩ gũtikĩagĩrĩire kũhikania-ĩ.
11Nowe akĩmera atĩrĩ, Ti othe mangĩhota gwĩtĩkĩra ũhoro ũcio, no arĩa mahotithĩtio.
12Amu-rĩ, kũrĩ andũ amwe maaciarirũo nĩ manyina matariĩ ta andũ ahakũre: na nĩkũrĩ angĩ mahakũrĩtwo nĩ andũ: na ningĩ, nĩkũrĩ angĩ metuĩte ta marĩ ahakũre o ene nĩ ũndũ wa ũthamaki wa Igũrũ. Ũrĩa ũkũhota gwĩtĩkĩra ũhoro ũcio, nĩawĩtĩkĩre.
13Hĩndĩ ĩo akĩreherũo twana nĩ getha atũigĩrĩre moko, na ahoe: nao arutwo magĩkaania arĩa maatũrehete.
14Nowe Jesu akĩmera, Rekei twana tũũke kũrĩ niĩ, na tigai gũtũgiria: nĩ ũndũ ũthamaki wa Igũrũ nĩ wa arĩa matariĩ tatuo.
15Nake agĩtũigĩrĩra moko, agĩcoka agĩĩthiĩra.
16Na atĩrĩrĩ, mũndũ ũmwe agĩũka kũrĩ we akĩmũũria atĩrĩ, Mũrutani, nĩ ũndũ ũrĩkũ mwega ingĩĩka nĩ getha ngagĩa na muoyo ũrĩa ũtagathira?
17Nake akĩmũcokeria atĩrĩ, Ũgũkĩnjũria niĩ ũhoro wa ũndũ ũrĩa mwega nĩkĩ? Nĩkũrĩ o Ũmwe mwega: no rĩrĩ, ũngĩkĩenda gũtonya muoyo-inĩ, ikaraga ũiguĩte maathani.
18Nake akĩmũũria atĩrĩ, Nĩ marĩkũ? Jesu akĩmwĩra, Ndũkanoragane, Ndũkanatharanie, Ndũkanaiye, Ndũkanaigĩrĩre mũndũ ũrĩa ũngĩ kĩgenyo,
19Tĩaga thoguo na nyũkwa: na ningĩ, Endaga mũndũ ũrĩa ũngĩ o ta ũrĩa wĩendete wee mwene.
20Nake mwanake ũcio akĩmwĩra Maũndũ macio mothe ndũire ndĩmarũmĩtie: nĩ ũndũ ũrĩkũ ũngĩ ndigairie?
21Nake Jesu akĩmwĩra, Ũngĩenda kwagĩrĩra kũna, thiĩ ũkendie indo iria wĩ nacio ũhe athĩni, na nĩũkagĩa na ũtonga Igũrũ: na ũũke ũ’hikĩre.
22No rĩrĩa mwanake ũcio aaiguire ciugo icio, agĩthiĩ arĩ na kĩeha: nĩ gũkorũo nĩ mũndũ warĩ na indo nyingĩ.
23Nake Jesu akĩĩra arutwo ake, Ngũmwĩra atĩrĩ na ma, nĩ ũndũ wĩ hinya gĩtonga gĩtonye ũthamaki-inĩ wa Igũrũ.
24Na ningĩ ngũmwĩra atĩ, Nĩ ũhũthũ ngamĩra ĩhungure kahoro ga cingano kũrĩ gĩtonga gĩtonye ũthamaki-inĩ wa Ngai.
25Na rĩrĩa arutwo ake maaiguire ũguo, magĩkĩgega mũno, makĩũrania, Hakĩrĩ ũguo-rĩ, nũ ũngĩkĩhota kũhonoka?
26Nake Jesu, akĩmarora akĩmera, Ũndũ ũcio ndũngĩhoteka nĩ andũ, no maũndũ mothe mahotekaga nĩ Ngai.
27Hĩndĩ ĩo Petero akĩmũcokeria akĩmwĩra atĩrĩ, Ta rora! Ithuĩ nĩtũtigĩte indo ciothe tũgakũrũmĩrĩa; nĩ ũndũ ũcio-rĩ, tũkaheo kĩ?
28Nake Jesu akĩmera atĩrĩ, Ngũmwĩra na ma, atĩ inyuĩ arĩa mũnũmĩrĩire nĩmũgaikarĩra itĩ cia ũthamaki ikũmi na igĩrĩ, mũgĩtuĩra mĩhĩrĩga ĩrĩa ikũmi na ĩĩrĩ ya Isiraeli ciira, hĩndĩ ĩrĩa gũkagĩa na thĩ njerũ, o rĩrĩa Mũrũ wa Mũndũ agaikarĩra gĩtĩ gĩake gĩa ũthamaki, kĩrĩa kĩĩ riri.
29Na mũndũ o wothe ũrĩa ũgakorũo atigĩte nyũmba ciake, kana ariũ a nyina, kana aarĩ a nyina, kana ithe, kana nyina, kana ciana, kana ithaka, nĩ ũndũ wa rĩĩtwa rĩakwa, nĩakaheo maita igana, na agaĩrũo muoyo ũrĩa ũtagathira.
30No rĩrĩ, andũ aingĩ arĩa marĩ a mbere magatuĩka a thutha, na arĩa marĩ a thutha matuĩke a mbere.
Sign in to highlight verses and keep them in sync with the mobile app.