← All books
AMPKIKUYUKJVNIVNKJVNLTNRSV
1Ningĩ ciana cia Isiraeli igĩgĩĩka maũndũ marĩa monagwo me moru nĩ Jehova, nake Jehova agĩcirekereria agĩcineana moko-inĩ ma Amidiani mĩaka mũgwanja.
2Nao Amidiani makĩhoota Aisiraeli o kũmahoota, nacio ciana cia Isiraeli igĩkĩĩenjera marima irĩma-inĩ, o na igĩĩthondekera ngurunga, o na mĩciĩ ĩrĩ na ihingo nũmu, nĩ ũndũ wa andũ acio a Midiani.
3Na gũgĩkinya atĩrĩ, atĩ hĩndĩ ĩrĩa Aisiraeli maakorirũo mahandĩte irio, Amidiani magĩgĩthiĩ bũrũri wao me hamwe na Aameleki, o na ciana cia mwena wa irathĩro, magĩkĩambata makahũrane nao;
4nao magĩkĩamba hema ciao mamang’etheire, magĩgĩthũkia irio iria ciarĩ mĩgũnda, kũndũ guothe o nginya Gaza, nakuo kũu bũrũri wa Isiraeli matiigana gũtigia kĩndũ o na kĩmwe kĩngĩtũũria mũndũ, o na arĩ mbũri, kana ndegwa, o na kana ndigiri.
5Nĩ gũkorũo maambatire kuo na ũhiũ wao, o na hema ciao, magĩgĩtonya bũrũri ũcio matariĩ o ta ngigĩ nĩ kũingĩha; andũ acio o ene, o na ngamĩra ciao, matiatarĩkaga; nao maatonyire bũrũri ũcio nĩ getha makawanange biũ.
6Aisiraeli magĩkĩhinyario mũno nĩ Amidiani acio, nacio ciana cia Isiraeli igĩgĩkaĩra Jehova.
7Na gũgĩkinya atĩrĩ, atĩ hĩndĩ ĩrĩa ciana cia Isiraeli ciakaĩire Jehova nĩ ũndũ wa Amidiani-rĩ,
8Jehova agĩkĩrekia mũnabii harĩ ciana icio cia Isiraeli, agĩciĩra atĩrĩ, Jehova, Ngai wa Isiraeli, oiga ũũ: Nĩ niĩ ndamũrutire bũrũri wa Misiri, o na ngĩmũruta nyũmba ya ũkombo,
9na ngĩmũhonokia moko-inĩ ma Amisiri, o na ma andũ arĩa othe maamũhinyagĩrĩria, ngĩmaingata ngĩmwehereria, ngĩcoka ngĩmũhe bũrũri wao,
10ningĩ ngĩmwĩra atĩrĩ, Niĩ nĩ niĩ Jehova Ngai wanyu; mũtikanatĩe ngai cia Aamori, arĩa ene bũrũri ũyũ mũtũire; no rĩrĩ, uuge wakwa mũtiaũiguire.
11Nake mũraika wa Jehova agĩgĩthiĩ agĩikara thĩ gĩtina-inĩ kĩa mũgandi o kũu Ofira, na mwene guo aarĩ Joashu Mwabiezeri; na rĩrĩ, hĩndĩ ĩo mũrũwe, Gideoni, aarĩ kĩhihĩro-inĩ kĩa ndibei akĩhũrĩra ngano hau thĩinĩ, amĩhithe ndĩkonwo nĩ Amidiani.
12Nake mũraika ũcio wa Jehova akĩmuumĩrĩra, akĩmwĩra atĩrĩ, Jehova e hamwe nawe, wee njamba ĩno ĩrĩ hinya.
13Nake Gideoni akĩmwĩra ũũ: Atĩrĩrĩ, mwathi wakwa, Jehova angĩkorũo e hamwe na ithuĩ-rĩ, nĩ kĩ gĩgĩtũmĩte maũndũ maya mothe matũkore? Ningĩ-rĩ, kaĩ mawĩra make marĩa ma kũgegania makĩrĩ ha, marĩa maithe maitũ maatwĩraga ũhoro wamo, makiuga atĩrĩ, Githĩ Jehova ndaatwambatirie, agĩtũruta Misiri? No rĩrĩ, rĩu Jehova nĩatũteete, agatũrekereria, agatũneana moko-inĩ ma Amidiani.
14Nake Jehova akĩmũrora, akĩmwĩra atĩrĩ, Thiĩ na hinya ũyũ wĩ naguo ũkahonokie Aisiraeli ũmarute moko-inĩ ma Midiani. Githĩ ti niĩ ndagĩkũrekia ũgeke ũndũ ũcio?
15Nake agĩkĩmũcokeria atĩrĩ, Hĩ, Mwathani, niĩ ngũkĩhonokia Isiraeli atĩa? Kuona atĩ mbarĩ iitũ nĩyo thĩni gũkĩra iria ingĩ ciothe cia Manase; na ningĩ nĩ niĩ mũnyinyi wa arĩa angĩ othe thĩinĩ wa nyũmba ya awa.
16Nake Jehova agĩkĩmwĩra atĩrĩ, Ti-itherũ nĩngũikara hamwe nawe, na nĩũkũhũra Amidiani ũmanine ta marĩ o mũndũ ũmwe.
17Nake Gideoni akĩmwĩra ũũ: Atĩrĩrĩ, ingĩkorũo nĩnjĩtĩkĩrĩkĩte nĩwe-rĩ, kĩnyonie kĩmenyithia gĩa atĩ nĩwe ũraaria na niĩ.
18Ndagũthaitha ndũkae kuuma haha mũira wa njoke haha harĩ wee, ndute kĩndũ kĩrĩa ngwenda gũkũhe ndĩkĩige mbere yaku. Nake mũraika ũcio akĩmũcokeria atĩrĩ, Nĩngweterera mũira wa ũcoke gũũka.
19Gideoni agĩgĩtonya nyũmba agĩthĩnja kori agĩgathondeka, o na agĩthondeka mĩgate ĩtarĩ mĩimbie ya eba ng’ima ya mũtu; agĩgĩĩkĩra nyama ciako gĩkabu-inĩ, naguo thathi akĩwĩkĩra nyũngũ, akĩmũtwarĩra akĩmũigĩra hau aarĩ gĩtina-inĩ kĩa mũgandi ũcio.
20Nake mũraika wa Ngai akĩmwĩra atĩrĩ, Oya nyama icio, o na mĩgate ĩo ĩtarĩ mĩimbie, ũciigĩrĩre ihiga-inĩ rĩrĩ igũrũ, o naguo thathi ũũite ho. Agĩgĩĩka o ta ũguo.
21Hĩndĩ ĩo mũraika wa Jehova agĩtwaratwara rũthanju rũrĩa aarĩ naruo guoko, akĩhutia nyama icio, o na mĩgate ĩo ĩtarĩ mĩimbie, na mũthia waruo, naguo mwaki ũgĩakana uumĩte ihiga-inĩ rĩu, ũgĩcina nyama icio o na mĩgate ĩo ĩtarĩ mĩimbie, ũgĩcinina biũ; nake mũraika wa Jehova agĩkĩbuĩria, na ndaacokire kũmuona.
22Nake Gideoni agĩkĩona atĩ nĩ mũraika wa Jehova, agĩkiuga atĩrĩ, Ĩiya wakwa-ĩ, ngũgĩĩka atĩa rĩu, Jehova Ngai, tondũ ndĩ kuona mũraika wa Jehova, twonana ũthiũ na ũthiũ.
23Nake Jehova agĩkĩmwĩra atĩrĩ, Ũrogĩa na thayũ; tiga gwĩtigĩra; ndũkua.
24Hĩndĩ ĩo Gideoni agĩgĩakĩra Jehova kĩgongona hau, agĩgĩĩta Jehova-shalomu; nakĩo gĩtũire kũu Ofira kwa Aabieziri o na ũmũthĩ.
25Na gũgĩkinya atĩrĩ, atĩ ũtukũ o ro ũcio Jehova akĩmwĩra atĩrĩ, Oya ndegwa ĩmwe njĩthĩ ya thoguo, ũcoke ũthure ĩngĩ ya kerĩ ya mĩaka mũgwanja ya iria e nacio, nakĩo kĩgongona kĩa Baali kĩrĩa thoguo arĩ nakĩo ũkĩgũithie thĩ, na ũtemenge Ashera ĩrĩa ĩĩ hakuhĩ nakĩo;
26ũcoke wakĩre Jehova Ngai waku kĩgongona gũkũ mũciĩ ũyũ, hau igũrũ kĩhingo-inĩ kĩrĩa kĩrũmu, ũgĩake wega o ta ũrĩa kĩagĩrĩire gwakwo; ũcoke woe ndegwa ĩo ya kerĩ, ũmĩrute ĩtuĩke ihaki rĩa njino, na ũmĩcinĩre na ngũ cia Ashera ĩo watemenga.
27Nake Gideoni agĩkĩoya andũ ikũmi thĩinĩ wa ndungata ciake agĩgĩĩka o ta ũrĩa Jehova aamwĩrire eke; na gũgĩkinya atĩrĩ, atĩ tondũ nĩetigagĩra andũ a nyũmba ya ithe o na andũ a itũũra rĩao, ndaahotire gwĩka ũndũ ũcio mũthenya, no aawĩkire ũtukũ.
28Na gũgĩkinya atĩrĩ, atĩ hĩndĩ ĩrĩa andũ a itũũra rĩu maarokire gũũkĩra rũcinĩ tene, makĩona atĩ kĩgongona kĩa Baali nĩ kiunĩkangu gĩkagũa thĩ, o nayo Ashera ĩrĩa yarĩ hakuhĩ nakĩo nĩ ndemenge, nayo ndegwa ĩo ya kerĩ ĩgathĩnjĩrũo kĩgongona-inĩ kĩu gĩaakĩtwo.
29Nao magĩkĩũrania o mũndũ na mũndũ atĩrĩ, Nũ wĩkĩte ũndũ ũyũ? Na rĩrĩa maakĩũũrĩrĩirie mũno, gũkĩĩranwo atĩrĩ, Nĩ Gideoni wa Joashu wĩkĩte ũndũ ũyũ.
30Hĩndĩ ĩo andũ acio a itũũra rĩu magĩkĩĩra Joashu atĩrĩ, Umia mũrũguo na nja, akue; nĩ ũndũ nĩoinangĩte kĩgongona kĩa Baali agakĩgũithia thĩ, o na agatemenga Ashera ĩrĩa ĩrarĩ hakuhĩ nakĩo.
31Nake Joashu agĩkĩĩra andũ acio othe maarũgamĩte harĩ we ũũ: Anga nĩmũgũkĩrũĩrĩra Baali? Kana nĩmũgũkĩmũhonokia? Mũndũ ũrĩa ũkũmũrũĩrĩra-rĩ, nĩoragwo o ro rĩu rũcinĩ. Angĩkorũo nĩwe ngai-rĩ, nĩarekwo erũĩrĩre we mwene, nĩ ũndũ he mũndũ uunangĩte kĩgongona gĩake, agakĩgũithia thĩ.
32Tondũ ũcio agĩgĩtua Gideoni Jerub-baali mũthenya o ro ũcio, akiuga atĩrĩ, Baali nĩarekwo arũe nake we mwene, nĩ gũkorũo nĩoinangĩte kĩgongona gĩake, agakĩgũithia thĩ.
33Hĩndĩ ĩo Amidiani, na Aamaleki, o na ciana cia mwena wa irathĩro, othe makĩũngana; magĩkĩringa mũrĩmo, makĩamba hema ciao gĩtuamba-inĩ kĩa Jezireeli.
34No rĩrĩ, roho wa Jehova ũgĩgĩkora Gideoni, ũkĩgĩa nake, na tondũ ũcio akĩhuha coro, nao Aabiezeri makĩũngana makĩmũrũmĩrĩra.
35Agĩgĩcoka akĩrekia andũ magacange bũrũri wothe wa Amanase; nao othe makĩũngana harĩ we, makĩmũrũmĩrĩra; o na akĩrekia andũ mabũrũri ma Aasheri, o na Azebuluni, o na Anafitali, nao othe magĩgĩthiĩ makamũtũnge.
36Nake Gideoni agĩkĩĩra Ngai atĩrĩ, Ũngĩkorũo nĩũkũhonokia Isiraeli na guoko gwakwa, o ta ũrĩa uugĩte atĩ nĩũgeka-rĩ,
37atĩrĩrĩ, nĩngũiga rũũa rũa ng’ondu kĩhuhĩro-inĩ kĩa ngano; na rĩrĩ, rũũa rũu rũaroka gũkorũo noruo ruiki rũĩ na ireera, nakuo kũrĩa kũngĩ guothe thĩ gũkorũo gwĩ kũũmũ-rĩ, nĩngakĩmenya atĩ nĩũkũhonokia Isiraeli na guoko gwakwa, o ta ũguo uugĩte.
38Gũgĩgĩtuĩka o ro ũguo; nĩ ũndũ rĩrĩa aarokire gũũkĩra rũcinĩ tene, nĩaathunanĩire rũũa rũu, akĩrũhiha nĩguo ireera rĩitĩke, agĩkĩiyũria maĩ kabakũri kagima.
39Ningĩ Gideoni akĩĩra Ngai atĩrĩ, Tiga gwakanwo nĩ marakara nĩ ũndũ wakwa, njarie o rĩaria rĩmwe rĩngĩ; ndagũthaitha ũreke ngerie o igeria rĩmwe rĩngĩ na rũũa rũrũ; reka o rũũa rũrũ ruiki rũroke gũkorũo rũĩ rũũmũ, nakuo kũrĩa kũngĩ guothe thĩ gũgakorũo kũrĩ ireera.
40Nake Ngai agĩgĩĩka o ro ũguo ũtukũ ũcio; nĩ gũkorũo no rũũa rũu ruiki rũakorirũo rũĩ rũũmũ, nakuo kũrĩa kũngĩ guothe thĩ kwarĩ ireera.
Sign in to highlight verses and keep them in sync with the mobile app.