← All books
AMPKIKUYUKJVNIVNKJVNLTNRSV
1Na gũgĩkinya atĩrĩ, atĩ Samueli aakũra-rĩ, agĩtua ariũ ake aciri a gũcirĩra Isiraeli.
2Mũrũwe wa irigithathi etagwo Joeli, na wa itiema agetwo Abija; acio magĩgĩtuĩka aciri kũu Biri-shiba.
3No rĩrĩ, ariũ acio ake matiathiire na mĩthiĩre ta yake, no nĩ kũgarũrũka maagarũrũkire makĩĩrirĩria ũtonga, magakĩamũkagĩra ihaki, na makahotomagia cira.
4Hĩndĩ ĩo athuri othe a Isiraeli magĩkĩũngana, magĩthiĩ gwĩ Samueli o kũu Rama,
5nao makĩmwĩra ũũ: Atĩrĩrĩ, rĩu ũgũgĩkũra, na ariũ aku matithiaga na mĩthiĩre ta yaku; gĩtũcarĩrie mũthamaki atũciragĩre o ta ndũrĩrĩ iria ingĩ ciothe.
6No rĩrĩ, ũndũ ũcio ndwakenirie Samueli rĩrĩa maamwĩrire, Tũhe mũthamaki atũciragĩre. Nake Samueli agĩkĩhoya Jehova.
7Nake Jehova akĩĩra Samueli atĩrĩ, Ĩtĩkĩra uuge wa andũ acio maũndũ-inĩ mothe marĩa megũkwĩra; nĩ gũkorũo tiwe maarega, no nĩ niĩ maarega, ndigatuĩke mũthamaki wao ndĩmathamakagĩre.
8O ta ũrĩa maũndũ mothe marĩa matũire mekaga gwata mũthenya ũrĩa ndamaambatirie ngĩmaruta Misiri, o nginya ũmũthĩ, matariĩ, ma ũrĩa matũire matiganaga na niĩ, magatungatĩra ngai ingĩ-rĩ, ũguo noguo wee nawe megũgwĩka.
9Tondũ ũcio, ĩtĩkĩra uuge wao; no rĩrĩ, mataare mũno, na ũmonererie ũrĩa ũhoro ũgatuĩka wa mũthamaki ũcio ũkamathamakĩra.
10Samueli agĩkĩhe andũ acio metĩtie mũthamaki mohoro macio mothe ma Jehova.
11Agĩkiuga atĩrĩ, Ũũ nĩguo ũhoro wa mũthamaki ũcio ũkamũthamakĩra ũgatuĩka; nĩ gũthiĩ agathiaga na ariũ anyu, akamatue atwari ngari ciake cia ita, na ahaici mbarathi ciake, na atongoria a ngari ciake cia ita mateng’erete;
12na amatue anene a athigari ngiri, na a athigari mĩrongo ĩtano; na amwe amatue a kũmũrĩmagĩra mĩgũnda yake, na a kũmũgethagĩra magetha make, na a kũmũthondekagĩra indo ciake cia ita, na cia ngari ciake cia ita.
13Nao airĩtu anyu athiage nao a kũmũthondekera irio irĩ mũrĩo, na amatue arugi, na athondeki mĩgate.
14Ningĩ nĩagathiaga na mĩgũnda yanyu, na mĩgũnda yanyu ya mĩthabibu, na ya mĩtamaiyũ, athiage na ĩrĩa mĩega mũno gũikĩra ĩrĩa ĩngĩ, akamĩhe ndungata ciake.
15Ningĩ nĩagathiaga na gĩcunjĩ gĩa ikũmi kĩa mbeũ cianyu, o na kĩa mĩgũnda yanyu ya mĩthabibu, acihe anene ake a athigari, na ndungata ciake.
16Na athiage na ndungata cianyu cia arũme, na cia aka, na aanake anyu arĩa ega mũno, na ndigiri cianyu, ikamũrutagĩre wĩra wake.
17Ningĩ nĩagathiaga na gĩcunjĩ gĩa ikũmi kĩa ndũru cianyu, na inyuĩ mũtuĩke ndungata ciake.
18Na hĩndĩ ĩo nĩmũgakaya nĩ mũthamaki wanyu ũcio mũgakorũo mwĩthurĩire, na Jehova ndarĩ ũndũ akamũcokeria hĩndĩ ĩo.
19No rĩrĩ, andũ acio nĩmaaregire kũigua uuge wa Samueli, makiuga atĩrĩ, Aca, gũtirĩ hingo tũtekũgĩa na mũthamaki atũthamakagĩre,
20nĩguo o na ithuĩ tũtuĩke ta ndũrĩrĩ iria ingĩ ciothe, na nĩ getha mũthamaki ũcio witũ atũciragĩre na atũtongoragie, na atũhũranagĩre ita-inĩ.
21Nake Samueli agĩgĩthikĩrĩria ciugo ciothe iria cioigirũo nĩ andũ acio, agĩgĩcoka agĩciiguithia Jehova.
22Nake Jehova akĩĩra Samueli atĩrĩ, Ĩtĩkĩra uuge wao, ũmacarĩrie mũthamaki. Nake Samueli agĩkĩĩra andũ acio a Isiraeli atĩrĩ, Gĩthiĩi, mũndũ o mũndũ acoke itũũra rĩao.
Sign in to highlight verses and keep them in sync with the mobile app.