← All books
AMPKIKUYUKJVNIVNKJVNLTNRSV
1Atĩrĩrĩ, ta twarĩrai ũrĩa wathanaga bũrũri tũtũrũme tuumĩte Sela, itũũra rĩrĩa rĩng’etheire werũ, tũkinye kĩrĩma-inĩ kĩa mwarĩ wa Zayuni.
2Nĩ ũndũ nĩgũgakinya atĩrĩ, atĩ o ta ũrĩa nyoni ciũrũraga, o na kana tũcui twa nyoni tũkorũra hĩndĩ ĩrĩa kanyũmba gatuo gaathario, ũguo noguo airĩtu a Moabi magaikara marĩ mariũko-inĩ ma Arinoni.
3Ta heana kĩrĩra na ũtuanĩre cira; ta reka kĩĩruru gĩaku kĩhumbanĩre mũthenya barigici, ũrugarĩ ũthire o ta ũtukũ; na rĩrĩ, arĩa maingatĩtwo-rĩ, mahithe, na mbũrũrũ ndũkamiumbũre.
4Ta reka andũ akwa arĩa maingatĩtwo maikaranie nawe; naho ha ũhoro wa Moabi-rĩ, ta ikara wĩ handũ hake ha kwĩhitha, nĩguo ehere mbere ya ũrĩa mwanangani, o nginya rĩrĩa mũrĩa-ng’ũũrũ akaaga gũcoka kuonwo, na ũtunyani ũtigwo, na ahinyanĩrĩria maninwo biũ mehere bũrũri.
5Hĩndĩ ĩo, gĩtĩ kĩa ũnene kĩa mũthamaki nĩgĩgaikara kĩrũmĩtio wega nĩ ũndũ wa ũrĩa gũkaiguanĩrũo tha, na kũgĩe mũndũ wa gũgĩikarĩra o kũu hema-inĩ ya Daudi, arĩ wa ma; mũndũ ũcio-rĩ, agatuanagĩra cira, athĩgĩtie o kĩhooto, namo maũndũ ma ũthingu nĩmo akahiũhaga gwĩka.
6Nĩtũiguĩte mwĩĩkĩrĩro wa Moabi, wa atĩ nĩeĩkĩrĩire mũno, na tũkaigua rũng’athio rũake rũa ũrĩa eĩkĩrĩire, agatũkũyana; no rĩrĩ, mwĩgatho ũcio wake-rĩ, ũtuĩkĩte o kĩndũ hatarĩ.
7Tondũ ũcio Mũmoabi nĩakaanũka arĩrĩre Mũmoabi ũrĩa ũngĩ, o mũndũ wao arĩre akĩanũkaga; ningĩ mũrĩrĩre ikũmba cia thabibu nyũmũ cia Kiri-haresethu rĩrĩa mũgakorũo mũitĩtwo mũito.
8Ĩiya-ĩ, amu mĩthabibu ya mĩgũnda ya Heshiboni na ya Sibima nĩ mĩhohu-ĩ! Aathani a ndũrĩrĩ nĩmoinangĩte mĩtĩ yakuo ĩrĩa mĩega; nĩyakinyaga Jazeri, ĩkamera o nginya werũ-inĩ; thuuna ciayo ciaharaganirio ikĩiyũra kũndũ guothe, igĩkinya iria-inĩ rĩrĩa inene.
9Tondũ ũcio nĩ kĩrĩro ngũrĩra ta kĩrĩa kĩrarĩrĩrũo Jazeri nĩ ũndũ wa mũthabibu wa Sibima; o na inyuĩ Heshiboni na Eleale-rĩ, ngũmũconjoria na maithori makwa, nĩ ũndũ wa ũrĩa mbugĩrĩrio ya ita ĩkinyĩte ĩkaiguwo o kũu maciaro-inĩ maku ma hĩndĩ ya ũrugarĩ, o na kũu magetha-inĩ maku.
10Ũhoro wa gũthera ngoro nĩweheretio, gũkaaga gĩkeno mũgũnda-inĩ ũrĩa ũraciaraga maciaro maingĩ. Gũtikagĩa ũhoro o na ũrĩkũ wa kũinwo nyĩmbo nĩ ũndũ wa mĩgũnda ya mĩthabibu, kana kũgĩe ndũrũhĩ cia gĩkeno. Gũtikagĩa mũhũri o na ũrĩkũ wa ndibei ihihĩro-inĩ rĩayo. Ngemi cia magetha-inĩ-rĩ, nĩndũmĩte itige kuugwo.
11Tondũ ũcio nĩndĩraikio nĩ ngoro nĩ ũndũ wa Moabi, ta arĩ nga cia kĩnanda ikũgucio, na ngathuthĩka ngoro nĩ ũndũ wa Kiri-heresu.
12Na gũgakinya atĩrĩ, atĩ hĩndĩ ĩrĩa Amoabi magathiĩ gũthathaiya, makĩĩnogeria itĩri-inĩ rĩa kũndũ gũtũũgĩru, makinye handũ hao harĩa haamũre makahoe-rĩ, matirĩ hingo makona kĩguni.
13Ũcio nĩguo ũhoro ũrĩa Jehova aaririe tene ũkoniĩ Amoabi.
14No rĩrĩ, rĩu Jehova nĩacokete kwaria, akoiga atĩrĩ, Mĩaka ĩtatũ ĩtanathira, o ta ũrĩa mĩaka ya mũndũ akĩandĩkwo wĩra ĩrĩkanagĩrũo-rĩ, riri wa Moabi nĩũgaitĩka kũmenererio hamwe na kĩrĩndĩ gĩake gĩothe, namo matigari make magakorũo me manyinyi mũno, matarĩ itarĩri.
Sign in to highlight verses and keep them in sync with the mobile app.