← All books
AMPKIKUYUKJVNIVNKJVNLTNRSV
1ŨHORO mũritũ ũkoniĩ Dameski nĩguo ũyũ: Atĩrĩrĩ, itũũra rĩa Dameski nĩrĩthengetio rĩtigacoke kuonwo ta rĩrĩ itũũra, tiga o rĩikare rĩrĩ iganjo itheri.
2Matũũra ma Aroeri-rĩ, nĩmathamĩtwo magatuĩka ũrĩithio wa ndũru cia mbũri, nacio igakomaga kuo, na gũtigĩe mũndũ wa gũcimakia.
3Ha ũhoro wa Efiraimu-rĩ, nĩgũkaaga kĩhingo kĩrĩa kĩrũmu gĩa gũkũgitĩra, narĩo Dameski rĩtige gũthamakwo nĩ mũthamaki warĩo; namo matigari wa Suriata makahaana o ta riri wa ciana cia Isiraeli; ũguo nĩguo Jehova Mũnene wa Ita ekuuga.
4Na nĩgũgakinya atĩrĩ, mũthenya ũcio, atĩ riri wa Jakubu nĩũkanyihio, na mwĩrĩ wake ũhĩnje harĩa ũnorete.
5Ũhoro wake ũkaringana na wa hĩndĩ ĩrĩa mũgethi egũcokereria ngano ĩrĩa ĩtarĩ ngethe, nakuo guoko gwake gũkagetha magira ma ngano. Ĩĩ, ti-itherũ, ũhoro ũcio ũkaringana na hĩndĩ ĩrĩa gũkũhaarũo ngano gĩtuamba kĩa Refaimu.
6No rĩrĩ, nĩgũgatigwo ngano ĩngĩhaarũo, o ta ũrĩa maciaro ma mĩtamaiyũ matangĩitĩka mothe mũtĩ ũcio wainainio, no ndamaiyũ igĩrĩ kana ithatũ igũtigwo rũhonge-inĩ rũrĩa rũrĩ o igũrũ gacũmbĩrĩ ka mũtĩ, o nacio inya kana ithano itigwo honge-inĩ iria irĩ o mĩthia-inĩ ĩrĩa ya mũtĩ ũrĩa ũciarĩte maciaro maingĩ ũguo nĩguo Jehova, Ngai wa Isiraeli, ekuuga.
7Mũthenya ũcio-rĩ, mũndũ agacũthagĩrĩria Mũmũũmbi, namo maitho make marongoragie Ũrĩa Mũtheru wa Isiraeli.
8Ndagacũthĩrĩria igongona iria arutĩire wĩra na moko make, o na kana arongorie kĩndũ kĩrĩa ethondekeire na ciara ciake, o na angĩkorũo nĩ Maashera kana mĩhianano ya kũhoya ya riũa.
9Mũthenya ũcio-rĩ, matũũra make marĩa me hinya magatuĩka o ta kũndũ gũthamĩtwo mũtitũ-inĩ, o na gacũmbĩrĩ-inĩ ga kĩrĩma, kũrĩa gwathamirũo gũgĩtigwo o ũguo ũtheri rĩrĩa andũ morire makĩehera mbere ya ciana cia Isiraeli; o ũguo taguo matũũra macio make nĩmagakira ihooru.
10Nĩ gũkorũo nĩũriganĩirũo nĩ Ngai ũrĩa wakũhonokirie, na ndũigana kũrũmbũiya Rũaro rũa Ihiga rũa hinya waku; ĩndĩ-rĩ, nĩ kũhanda wehandĩire mĩtĩ ĩrĩa ĩhandagĩrũo ngai ĩrĩa ĩĩtagwo Adonisi, ũkamĩhandanĩria na ngurukuhĩ cia gũtũma ngai ĩo ng’eni ĩririkanwo.
11Na rĩrĩ, mũthenya ũrĩa wamĩhandire nĩwacokire ũkĩmĩirigĩra, na rũcinĩ rũrũ rũngĩ ũkĩroka gũtũma mbeũ ĩo yaku ĩrute kĩro; no rĩrĩ, magetha nĩ kũũra makora mũthenya ũrĩa wĩ kĩeha o na ruo rũnene.
12Ĩiya-ĩ, amu he ironja ta rĩa kĩrĩndĩ kĩingĩ, narĩo rĩtariĩ ta mũrurumo wa maĩ maingĩ ma iria rĩrĩa inene; o na ningĩ he mũguthũko wa ndũrĩrĩ ikĩguthũka o ta maĩ maingĩ moinĩte na nditi!
13Ndũrĩrĩ-rĩ, ikaguthũka o ta maĩ maingĩ moinĩte; no rĩrĩ, We mwene nĩagacikũũma, nacio ciũre ithiĩ kũndũ kũraya mũno, na iteng’erio o ta ũrĩa mũũngũ wĩ irĩma-inĩ ũũmbũragwo nĩ rũhuho, o na ta ũrĩa rũkũngũ rũthiũrũrũkanagio nĩ kĩhuhũkanio kĩa rũhuho rũa ngoma-cia-aka.
14Ihinda rĩa hwaĩ-inĩ-rĩ, no kĩmako gĩtheri kũrĩ, na gũtanacoka gũkĩa-rĩ, andũ matirĩ ho. Rĩu nĩrĩo igai rĩa andũ arĩa matũtahaga indo ciitũ, na nĩguo ũhoro ũrĩa atũtunyi indo ciitũ magũĩrĩirũo nĩguo.
Sign in to highlight verses and keep them in sync with the mobile app.