← All books
AMPKIKUYUKJVNIVNKJVNLTNRSV
1NINGĨ ĩno nĩyo ndũmĩrĩri ĩrĩa yakinyĩrĩire Jeremia yumĩte he Jehova, akĩĩrũo atĩrĩ,
2Jehova Ngai wa Isiraeli nĩwe ũrakwarĩria, agakwĩra ũũ: Mohoro mothe marĩa ngũheete-rĩ, meandĩkĩre ibuku-inĩ.
3Nĩ ũndũ-rĩ, Jehova ekuuga ũũ: Matukũ nĩmagoka marĩa ngagarũra ũhoro wa andũ akwa Isiraeli na Juda arĩa matũire marĩ atahe, ndĩmacokithie bũrũri ũyũ ndaheire maithe mao, na nĩmakawĩgwatĩra ũtuĩke wao; ũguo nĩguo Jehova ekuuga.
4Namo mohoro marĩa Jehova aaririe makoniĩ Isiraeli na Juda nĩmo maya.
5Nĩ gũkorũo Jehova ekuuga ũũ: Nĩtũiguĩte mũgambo wĩ itua-nda, wa kũguoyohania, na ti wa thayũ.
6Rĩu-rĩ, ta tuĩriai ũhoro mũrore kana hihi mũndũ mũrũme nĩarũmagwo ta egũciara mwana; nĩ kĩ kĩragĩtũma nyone arũme othe menyitĩte njohero ta aka mekũrũmwo, na makagarũrũka magatuka gĩthiithi?
7Hĩ! Gĩtũmi nĩ ũndũ nĩ mũthenya mũnene mũno na gũtirĩ kwagĩa ũngĩ taguo; narĩo nĩ ihinda rĩa Jakubu rĩa kũnyarirĩka, no nĩakahonokio harĩ guo.
8Ningĩ Jehova Mũnene wa Ita ekuuga ũũ: Nĩgũgakinya atĩrĩ, atĩ mũthenya ũcio nĩngoinanga mũtĩ wake wa ngingo ũkuume ngingo, nacio nga iria wohetwo nacio ndĩcituange; nacio ndũrĩrĩ iria ingĩ itigacoka kũmũtua ndungata yacio rĩngĩ;
9no rĩrĩ, magatungatagĩra Jehova Ngai wao, o na Daudi mũthamaki wao, ũrĩa ngamaarahũrĩra.
10Tondũ ũcio, wee Jakubu ndungata yakwa, menya wĩtigĩre, o na kana ũmake, wee Isiraeli; nĩ ũndũ-rĩ, nĩngakũhonokia ngũrute kũu kũraya, naruo rũciaro rũaku ndĩrũrute bũrũri ũcio rũatwarĩrũo rĩrĩa rũatahĩrũo; nake Jakubu nĩagacoka, na aikare ahoreire na atarĩ na thĩna o na ũrĩkũ, na gũtirĩ mũndũ o na ũrĩkũ ũkamũguoyohia.
11Nĩ gũkorũo ndĩ hamwe nawe ngũhonokie; ũguo nĩguo Jehova ekuuga; nĩ ũndũ nĩnganina ndũrĩrĩ ciothe cia kũndũ guothe kũrĩa ngũharaganĩirie, ndĩcininũkie biũ; no wee ndigakũnina biũ, tiga o kũherithia ngakũherithia na kĩhooto, amu ndirĩ hingo ingĩgũtua ta ũtahĩtĩtie.
12Nĩ ũndũ Jehova ekuuga ũũ: Nguraro yaku ndĩngĩhoneka, narĩo itihia rĩaku nĩ rĩĩhu mũno.
13Gũtirĩ mũndũ wa gũgũthaithanĩrĩra nĩguo wohwo, na ndũrĩ na mũthaiga wa gũkũhonia.
14Anyanya aku othe nĩmariganĩirũo nĩwe; matikũrongoragia, nĩ ũndũ ngũtihĩtie itihia ta rĩrĩa mũndũ atihagio nĩ thũ yake, na ngakũherithia ta ũrĩa kũherithanagio nĩ mũndũ ũrĩa mwĩĩ mũno, tondũ wa ũrĩa waganu waku ũnenehete, namo mehia maku makongerereka mũno.
15Ũgũkĩrĩra nĩ ũndũ wa nguraro ĩo ũgurarĩtio nĩkĩ? Ruo rũrĩa wĩ naruo rũtingĩhoneka, nĩ ũndũ waganu waku nĩũnenehete, namo mehia maku makongerereka mũno; na nĩkĩo ngwĩkĩte maũndũ macio.
16Tondũ ũcio andũ othe arĩa makũrĩaga o nao nĩmakario; o nacio thũ ciaku ciothe, mũndũ o mũndũ arindũrũo; nao arĩa magũtahaga indo ciaku, o nao nĩmagatahwo, nao arĩa makũrĩaga na uungumania ndũme o nao marĩo na uungumania.
17Nĩ ũndũ nĩngagũcokeria hinya waku, na ngũhonie matihia maku; ũguo nĩguo Jehova ekuuga; nĩ gũkorũo magũtuĩte mũikio-na-kĩano, makiugaga atĩrĩ, Rĩu nĩrĩo Zayuni, itũũra rĩtarĩ mũndũ ũrĩrũmbũyagia.
18Ningĩ Jehova ekuuga ũũ: Atĩrĩrĩ, andũ arĩa maatahirũo a Jakubu nĩngamacokia hema-inĩ ciao, o nakuo kũndũ kwao gwa gũtũũra ndĩkũiguĩre tha; namo matũũra makuo macoke gwakwo ihumbu-inĩ ciamo, o nacio nyũmba cia ũnene icoke gũtũũrũo o ta tene.
19Na thĩinĩ wao nĩgũkaiguagwo ũhoro wa gũcokanĩria ngatho, o na mĩgambo ya ndũrũhĩ cia gĩkeno. Niĩ na niĩ nĩngamaingĩhia, na matigacoka kuonwo marĩ anyinyi, ningĩ ndĩmagoocithie, na maticoke kuonwo ta manyihĩirio andũ o na atĩa.
20Ciana ciao nĩikonagwo itariĩ o ta ũrĩa ciatariĩ tene, o nakĩo kĩrĩndĩ kĩa andũ ao gĩikare mbere yakwa kĩrũmĩtio wega, na nĩngahũra arĩa othe makĩhinyagĩrĩria.
21Nake mũnene wa andũ ao akoima o thĩinĩ wao kĩũmbe, o nake mwathi wao oime o thĩinĩ wa andũ ao na nĩngamuokokia harĩ niĩ, nake anguhĩhĩrie; nĩ ũndũ-rĩ, nĩ mũndũ ũrĩkũ ũngĩeta kũnguhĩhĩria na mwĩĩro wake we mwene? Ũguo nĩguo Jehova ekuuga.
22Inyuĩ na inyuĩ nĩmũgatuĩka andũ akwa, o na niĩ nduĩke Ngai wanyu.
23Atĩrĩrĩ, mang’ũrĩka ma Jehova nĩmonekete matariĩ ta kĩhuhũkanio kĩa rũhuho; ĩĩ, ti-itherũ makahaana ta kĩhuhũkanio kĩa rũhuho kĩrĩa kĩhurutanaga mũno, namo magakora mũndũ ũrĩa mwaganu na kĩguũ.
24Ningĩ marakara marĩa meĩ ma Jehova matikahũahũa tiga o hĩndĩ ĩrĩa agakorũo ekĩte na akahingia ũndũ o ũrĩa acirĩire gwĩka na ngoro yake; na rĩrĩ, matukũ-inĩ marĩa ma kũrigĩrĩria nĩguo mũgakuũka, mũmenye ũhoro ũcio wega.
Sign in to highlight verses and keep them in sync with the mobile app.