← All books
AMPKIKUYUKJVNIVNKJVNLTNRSV
1Ihinda rĩu-rĩ, nĩngakorũo ndĩ Ngai wa andũ othe a mbarĩ cia Isiraeli, nao matuĩke andũ akwa; ũguo nĩguo Jehova ekuuga.
2Ningĩ Jehova ekuuga ũũ: Atĩrĩrĩ, andũ arĩa maatigirio nĩ rũhiũ rũa njora nĩmetĩkĩrĩkire me kũu werũ-inĩ, o hĩndĩ ĩrĩa Isiraeli eriragĩria mũno kũhurũka.
3Nake Jehova aanyumĩrĩire kũu kũraya akĩnjĩra ũũ: Ti-itherũ ngwendete wendo ũrĩa ũtũũraga tene na tene; tondũ ũcio no ngirĩrĩirie gũgwĩka maũndũ ma ũtugi.
4Na nĩngacoka gũgwaka, nawe ũikare ũrũmĩte, wee mũirĩtu ũyũ, mwarĩ wa Isiraeli; ningĩ ũcoke kũgemio ũhũrĩrũo ihembe, na ũcomoke rũĩmbo-inĩ rũa andũ arĩa mabarĩrĩire maũndũ ma gĩkeno.
5O na ningĩ nĩũgacoka kũhanda mĩgũnda ya mĩthabibu irĩma-inĩ cia Samaria igũrũ, ahandi mamĩhande, na macoke kwĩhũnĩrĩria maciaro mayo.
6Nĩ ũndũ nĩhakagĩa mũthenya, naguo nĩguo arangĩri arĩa marangaga ithũngũri cia Efiraimu makaanĩrĩra, makiugaga atĩrĩ, Ũkĩrai twambate tũkinye Zayuni he Jehova Ngai witũ.
7Nĩ ũndũ Jehova ekuuga ũũ: Kũngũĩrai Jakubu, mũmũinĩre mũkenete, o na mũkũngũĩre mũnene wa ndũrĩrĩ; hunjanĩriai ũhoro mũgĩkũngũyagia, mũkiugaga atĩrĩ, Ĩ Jehova, honokia andũ aku, o arĩa matigarĩte a Isiraeli.
8Atĩrĩrĩ, nĩ kũrehe ngamarehithie ndĩmarute bũrũri wa gathigathini, ndĩmacokererie ndĩmarutĩte ituri-inĩ cia thĩ iria irĩ kũraya mũno, nao magakorũo marehanĩte na atumumu ao, na ithua, o na atumia arĩa me mahu, o na arĩa mekũrũmwo, moke me kĩrĩndĩ kĩingĩ mũno, gĩcoke gũkũ.
9Nao magoka makĩrĩraga, na niĩ ndĩmatongorie o magĩ’thaithaga, ndũme magere njũĩ-inĩ cia maĩ, o na magere njĩra ĩrĩa nũngarũ ĩtarĩ kĩndũ kĩngĩmahĩnga; nĩ gũkorũo niĩ nĩ niĩ ithe wa Isiraeli, nake Efiraimu nĩwe irigithathi rĩakwa.
10Atĩrĩrĩ, inyuĩ andũ a ndũrĩrĩ, ta iguai ndũmĩrĩri ya Jehova, na muumbũranĩre ũhoro wayo ithama-inĩ kũndũ kũraya mũno, muuge atĩrĩ, Ũrĩa wahurunjithirie andũ a Isiraeli-rĩ, nĩwe ũkamacokereria, na amamenyerere o ta ũrĩa mũrĩithi ariĩraga mbũri cia rũũru rũake.
11Nĩ ũndũ Jehova nĩakũũrĩte Jakubu, akamũhonokia, akamũruta guoko-inĩ kwa ũrĩa wamũkĩrĩtie hinya.
12Nao magoka mainĩre kĩrĩma-inĩ gĩa Zayuni, nao othe magunwo nĩ ũtugi wa Jehova, meyonere ngano, na ndibei, na maguta, o na tũgondu twa rũũru rũa mbũri o na rũa ng’ombe; o nacio ngoro ciao ihaane o ta mũgũnda uunithĩirio maĩ; na matigacoka kũgwatwo nĩ kĩeha o rĩ o rĩ.
13Hĩndĩ ĩo airĩtu nĩmagakena marĩ rũĩmbo-inĩ, nao aanake na athuri makenanĩre hamwe; nĩ ũndũ nĩngagarũra kĩeha kĩao gĩtuĩke gĩkeno, na ndĩmahorerie, ndũme makene mathirũo nĩ kĩeha.
14O nacio ngoro cia athĩnjĩri-Ngai nĩngacihũnia na bũthi, nao andũ akwa maiganwo nĩ maũndũ makwa marĩa mega; ũguo nĩguo Jehova ekuuga.
15Ningĩ Jehova ekuuga ũũ: He mũgambo ũraiguwo Rama wa gũcakaya na wa kũrĩra na kĩgi, Rakeli akĩrĩrĩra ciana ciake na akarega gũkirio nĩ ũndũ wacio, nĩ gũkorũo itirĩ ho.
16Jehova ekuuga ũũ: Wĩgirĩrĩrie mũgambo waku ũtige kũiguwo ũkĩrĩra, o namo maitho maku matige gũita maithori, nĩ gũkorũo wĩra waku nĩũkaheanĩrũo ngatho; ũguo nĩguo Jehova ekuuga. Ningĩ ciana icio ciaku nĩigacoka gũũka ciumĩte bũrũri wa thũ ciacio.
17Ningĩ kĩĩrĩgĩrĩro kĩĩ ho gĩa atĩ ũhoro waku nĩũkaagĩrĩra thutha-inĩ. Ũguo nĩguo Jehova ekuuga. Nacio ciana ciaku nĩigacoka gũũka ikinye bũrũri ũyũ wacio kĩũmbe.
18Ti-itherũ nĩnjiguĩte Efiraimu agĩĩcakaĩra we mwene akiugaga ũũ: Wee nĩũ’herithĩtie, na niĩ ngaherithio o ta ndĩ gacaũ gatamenyerete gwĩkĩrũo mũtĩ wa ngingo; ngarũra ũ’hũgũre, na niĩ njikare ’hũgũkĩte o ro ũguo, nĩ ũndũ wee nĩwe Jehova, Ngai wakwa.
19Ĩĩ, ti-itherũ thutha wa ndagarũrũo ndacokire kwĩricũkwo, na thutha wa ndataarĩka, ngĩĩgũtha kĩero, ngĩconoka; ĩĩ, ti-itherũ, nĩ gũconorithio ndaconorithirio, nĩ gũkorũo nĩndacokire gũtitikithio rũmena rũa maũndũ marĩa ndekaga ndĩ mũnyinyi.
20Anga Efiraimu towe mũrũ wakwa ũrĩa nyendete mũno? Anga towe mwana wa rũendo? Nĩ ũndũ-rĩ, o na harĩa njaragia kaingĩ ndeto cia kũmũũkĩrĩra-rĩ, no ngoragwo ngĩririkana ũrĩa ndĩmwendete; tondũ ũcio ngoro yakwa nĩĩgũtangĩka mũno nĩ ũndũ wake, na ti-itherũ nĩngamũiguĩra tha; ũguo nĩguo Jehova ekuuga.
21Wĩhandĩrei inyamũ cia gwĩkĩra kĩmenyithia njĩra-inĩ, o na mĩtĩ ya kũmũtongoria; roriai ngoro cianyu njĩra-inĩ ya gĩtwari, naguo ũguo nĩ ta kuuga o njĩra ĩrĩa mwagereire mũgĩthiĩ; garũrũka, wee mũirĩtu ũyũ mwarĩ wa Isiraeli, garũrũka ũcoke matũũra-inĩ maya maku.
22Nĩ nginya hĩndĩ ĩ ũgũtũũra ũriũngaga ũũ na ũũ, wee mwarĩ ũyũ ũ’hutatĩire na ũgacoka na thutha? Nĩ ũndũ-rĩ, Jehova nĩathondekete ũndũ mwerũ gũkũ thĩ wa atĩ mũndũ-wa-nja nĩwe ũkagitĩra mũndũ mũrũme.
23O na ningĩ Jehova Mũnene wa Ita, o we Ngai wa Isiraeli, ekuuga ũũ: Andũ nĩmagacoka kwarĩria ciugo ici rĩngĩ o gũkũ bũrũri wa Juda, o na matũũra-inĩ maguo, hĩndĩ ĩrĩa ngakorũo njoketie andũ ao kuo arĩa maatahirũo, moigage ũũ: Jehova arokũrathima, wee itũũra rĩrĩ rĩtũire rĩĩkagwo maũndũ ma kĩhooto thĩinĩ warĩo, na akũrathime, wee kĩrĩma gĩkĩ gĩtheru.
24Nao andũ a Juda o na arĩa othe matũũraga matũũra-inĩ makuo, magatũũrania kũu othe hamwe, arĩa arĩmi, o na andũ arĩa morũraga na ndũru ciao cia mbũri.
25Nĩ gũkorũo mũndũ ũrĩa mũnogu nĩndĩmũnogorete, o nao andũ othe mũndũ o mũndũ ũrĩa wĩ na kĩeha nĩndĩmũninĩire kĩeha.
26Thutha ũcio ngĩgĩũkĩra toro, ngĩbaranga, naguo toro ũcio wakwa ngĩigua ta uuma mwega mũno.
27Na atĩrĩrĩ, Jehova ekuuga ũũ: Matukũ nĩmagoka marĩa ngaingĩhĩria nyũmba ya Isiraeli, o na nyũmba ya Juda, mbeũ ya andũ, o na mbeũ ya nyamũ.
28Na nĩgũgakinya atĩrĩ, atĩ o ta ũrĩa ndaikaraga ndĩmoheirie nĩ getha ndĩmakahũre, o na ndĩmahehenje, o na ndĩmang’aũranie, o na ndĩmanine, o na ndĩmanyarire-rĩ, ũguo noguo ngaikara ndĩmagitĩire nĩ getha ndĩmaake wega, o na ndĩmahande wega; ũguo nĩguo Jehova ekuuga.
29Matukũ macio-rĩ, matigacoka kuuga o rĩ, o rĩ, ũũ: Maithe ma ciana nĩmarĩĩte thabibu irĩ rũagatha, namo magego ma ciana makaigua thithi.
30No rĩrĩ, mũndũ o mũndũ agakua nĩ ũndũ wa ũũru wake we mwene; nake mũndũ o wothe ũrĩa ũkarĩa thabibu irĩ rũagatha nĩwe ũkaigua thithi magego we mwene.
31Jehova ekuuga ũũ: Atĩrĩrĩ, matukũ nĩmagoka marĩa ngarĩkanĩra kĩrĩkanĩro kĩerũ na nyũmba ya Isiraeli, o na nyũmba ya Juda.
32Nakĩo kĩrĩkanĩro kĩu gĩtigatuĩka ta kĩrĩa ndarĩkanĩire na maithe mao hĩndĩ ĩrĩa ndamanyitire na guoko ngĩmaruta bũrũri wa Misiri; nĩ ũndũ matiigana kũrũmia kĩrĩkanĩro kĩu twarĩkanĩire nao, o na harĩa ndatuĩkĩte ta ndĩ mũthuri wao; ũguo nĩguo Jehova ekuuga.
33No rĩrĩ, Jehova ekuuga atĩrĩ, atĩ gĩkĩ nĩkĩo kĩrĩkanĩro kĩrĩa ngarĩkanĩra na nyũmba ya Isiraeli matukũ macio maathira; nĩ gwĩkĩra ngekĩra watho wakwa ngoro-inĩ ciao thĩinĩ, o na ndĩwandĩke meciria-inĩ mao; na nduĩke Ngai wao, nao matuĩke andũ akwa.
34Nao matigacoka kũrutana mũndũ na mũndũ ũrĩa ũngĩ, o na kana mũndũ arute mũrũ wa ithe, akĩmwĩra atĩrĩ, Umĩrania ngoro na Jehova nĩ gũkorũo andũ othe nĩmagakorũo ma’menyete, kuuma o ũrĩa mũnyinyi mũno wao gwata ũrĩa mũnene makĩria; ũguo nĩguo Jehova ekuuga nĩ ũndũ nĩngamohera waganu wao, o namo mehia mao ndigacoka kũmaririkana o rĩ, o rĩ.
35Jehova, we ũrĩa ũtũmaga riũa rĩrehanagĩre ũtheri mũthenya, o na akarũmia mawatho ma mweri na njata nĩguo irehanagĩre ũtheri ũtukũ, o we ũtũmaga iria rĩkire ki rĩrĩa makũmbĩ marĩo mekũruruma, ũcio nĩ kwaria ekwaria, narĩo rĩĩtwa rĩake nĩ Jehova Mũnene wa Ita;
36Jehova ũcio egũkiuga atĩrĩ, Mawatho macio mangĩriganĩra, ndige gũcoka kũrũmbũiya ũhoro wamo-rĩ, hĩndĩ ĩo o naruo rũciaro rũa Isiraeli rũkahuka, rũage gũcoka gũtuĩka rũrĩrĩ harĩ niĩ tene na tene.
37Ningĩ Jehova ekuuga ũũ: Atĩrĩrĩ, kũngĩkorũo igũrũ matu-inĩ marĩa mairũ kwahota gũthimĩka, o nacio itina iria irũmĩtie thĩ ituĩrĩke kũu ruungu rũayo kũrĩa irĩ-rĩ, niĩ o na niĩ ndaingata rũciaro rũa Isiraeli ruothe nĩ ũndũ wa maũndũ mothe marĩa rũaneka; ũguo nĩguo Jehova ekuuga.
38Atĩrĩrĩ, Jehova ekuuga ũũ: Matukũ nĩmagoka marĩa Jehova agacoka gwakithĩrio itũũra kuuma o mũthiringo-inĩ wa nyũmba ndaya na igũrũ wa Hananeli, o nginya kĩhingo-inĩ gĩa koine.
39Naruo rũkwaro rũa gũthima rũgatwarũo na mbere rũrũngarĩte o nginya rũkinye gĩthũngũri-inĩ kĩa Garebu, rũcoke rũrigicũrũo rũkinyio Goa.
40Nakĩo gĩtuamba gĩothe kĩrĩa gĩteagwo ciimba, na gĩgaitwo mũhu wa kĩgongona-inĩ, o na mĩgũnda yothe nginya o karũũĩ ga Kidironi, o na nginya koine-inĩ ga Kĩhingo kĩa Mbarathi kĩĩ mwena wa irathĩro-rĩ, kũu guothe nĩgũkaamũrĩrũo Jehova, na gũtigacoka kwanangwo o na kana kũng’aũranio o rĩ, o rĩ.
Sign in to highlight verses and keep them in sync with the mobile app.