← All books
AMPKIKUYUKJVNIVNKJVNLTNRSV
1NA RĨRĨ, Zedekia, mũrũ wa Josia, nĩaatuĩkire mũthamaki, agĩthamaka ithenya rĩa Konia, mũrũ wa Jehoiakimu, nake aatuĩtwo mũthamaki wa bũrũri wa Juda nĩ Nebukadirezaru, mũthamaki wa Babuloni.
2No rĩrĩ, we mwene, o na kana ndungata ciake kana andũ a bũrũri wake-rĩ, gũtirĩ o na ũmwe warũmbũyagia ndũmĩrĩri cia Jehova iria aaragia na kanua ka Jeremia, mũnabii.
3Nake Zedekia ũcio mũthamaki akĩrekia Jehukali wa Shelemia, na Zefania wa Maaseia, mũthĩnjĩri-Ngai, mathiĩ kũrĩ Jeremia ũcio mũnabii, akĩmwĩra atĩrĩ, Tũhoere harĩ Jehova Ngai witũ.
4Na rĩrĩ, hĩndĩ ĩo Jeremia nĩ gũthiĩ ethiagĩra o ro ũguo thĩinĩ wa andũ, nĩ ũndũ nĩ mbere ya atanaikio kĩoho-inĩ.
5Namo matukũ-inĩ macio mbũtũ cia ita cia Firauni igĩkorũo ciumagarĩte ikoima Misiri; na rĩrĩ, hĩndĩ ĩrĩa Akalidei, arĩa maarigicĩirie Jerusalemu marĩtunyane maaiguire ũhoro wa mbũtũ icio, makĩhũndũka makĩehera kũu Jerusalemu.
6Hĩndĩ ĩo ndũmĩrĩri ya Jehova ĩgĩkinyĩrĩra mũnabii ũcio ti Jeremia, akĩĩrũo atĩrĩ,
7Jehova Ngai wa Isiraeli ekuuga ũũ: Thiĩ wĩre mũthamaki wa Juda, ũcio ũkũrekirie ũtuĩrie ũhoro harĩ niĩ, ũũ: Atĩrĩrĩ, mbũtũ cia ita cia Firauni icio ciũkĩte gũgũteithia-rĩ, nĩigwĩcokera o kũu Misiri bũrũri wacio.
8Na rĩrĩ, Akalidei nĩmarĩcoka gũũka, marũe mbaara na andũ a itũũra rĩrĩ, nao marĩĩgwatĩre, macoke marĩcine na mwaki.
9Ningĩ Jehova ekuuga ũũ: Menyai mwĩhenie inyuene mũkiuga atĩrĩ, Ti-itherũ gũtirĩ hĩndĩ Akalidei mategũthiĩ matweherere nĩ ũndũ-rĩ, matikamweherera.
10Amu o na mũngĩkorũo mũhũrĩte mbũtũ ciothe cia ita cia Akalidei acio mararũa mbaara na inyuĩ, na gũtuĩke atĩ no andũ arĩa aguraru matigarĩte thĩinĩ wao-rĩ, matirĩ hingo matangĩarahũka, mũndũ o mũndũ oime hema-inĩ yake, na macine itũũra rĩrĩ na mwaki.
11Na gũgĩkinya atĩrĩ, atĩ hĩndĩ ĩrĩa mbũtũ cia ita cia Akalidei ciahũndũkĩte igatiga gũtharĩka Jerusalemu ikehera kuo nĩ ũndũ wa gwĩtigĩra mbũtũ cia ita cia Firauni-rĩ,
12Jeremia agĩkiuma kũu Jerusalemu nĩguo athiĩ akinye bũrũri wa Benjamini, akegwatĩre gĩthaka kĩrĩa gĩake kuo thĩinĩ wa andũ ao.
13No rĩrĩ, aakinya kĩhingo-inĩ kĩrĩa kĩarorete na kũu Benjamini-rĩ, agĩgĩkora mũnene ũmwe wa arangĩri ho, nake etagwo Irija, mũrũ wa Shelemia wa Hanania; nake agĩkĩnyita Jeremia ũcio mũnabii, akĩmwĩra atĩrĩ, Wee wathiĩ kwĩneana harĩ Akalidei.
14Hĩndĩ ĩo Jeremia nake agĩkiuga atĩrĩ, Nĩ maheni; ndirathiĩ kwĩneana harĩ Akalidei; no rĩrĩ, ndaigana kũmũigua. Irija ũcio agĩkĩnyita Jeremia, akĩmũtwara harĩ anene.
15Nao anene acio makĩgwatwo nĩ matũkũya nĩ ũndũ wa Jeremia, makĩmũhũra, makĩmũikia kĩoho-inĩ o kũu nyũmba ya Jonathani, mwandĩki-marũa; nĩ ũndũ nĩmaamĩtuĩte nyũmba ya kĩoho.
16Nake Jeremia agĩgĩtonyio muungu-inĩ wĩ kanyũmba ga thĩinĩ mũno kũu nyũmba ĩo ya kĩoho, akĩnina matukũ maingĩ ho;
17na thutha ũcio mũthamaki ũcio ti Zedekia agĩkĩrekania, akĩmũgĩrithia; nake mũthamaki akĩmwarĩria na hitho e kũu gwake nyũmba, akĩmũũria atĩrĩ, Nĩharĩ ũhoro o na ũrĩkũ uumĩte he Jehova? Nake Jeremia agĩkiuga atĩrĩ, Ĩĩ, nĩharĩ. O na ningĩ akiuga atĩrĩ, Wee nĩũkarekererio ũneanwo moko-inĩ ma mũthamaki wa Babuloni.
18Ningĩ Jeremia akĩũria mũthamaki ũcio ti Zedekia atĩrĩ, Ũndũ ũrĩa ngwĩhĩtie naguo wee mwene, o na kana ndungata ciaku, o na kana andũ aku-rĩ, nĩ ũrĩkũ, atĩ nĩkĩo ũnjikithĩtie kĩoho-inĩ?
19Rĩu-rĩ, anabii aku makĩrĩ ha arĩa maakũrathĩire ũhoro, makiuga ũũ: Mũthamaki wa Babuloni ndagoka gũgũtharĩkĩra, o na kana atharĩkĩre andũ a bũrũri ũyũ?
20Rĩu ta thikĩrĩria, ndagũthaitha, mwathi wakwa, mũthamaki ũyũ; ĩtĩkĩra gũthaithana gwakwa, ndũkanjokithie nyũmba ĩo ya Jonathani mwandĩki-marũa, nĩ getha ndigakuĩre kuo.
21Hĩndĩ ĩo Zedekia, mũthamaki, agĩathana atĩ Jeremia atonyio kĩhingo-inĩ kĩa arangĩri arĩ kĩo; nake aaheagwo o mũthenya mũgate ũrutĩtwo njĩra-inĩ ya athondeki mĩgate, o nginya hĩndĩ ĩrĩa mĩgate ĩo yathirire kũu itũũra-inĩ. Ũguo nĩguo Jeremia aagĩcokire gũikara kĩhingo-inĩ kĩu kĩa arangĩri.
Sign in to highlight verses and keep them in sync with the mobile app.