← All books
AMPKIKUYUKJVNIVNKJVNLTNRSV
1Na rĩrĩ, Shefatia wa Matani, na Gedalia wa Pashuri, na Jukali wa Shelemia, na Pashuri wa Malikija, makĩigua mohoro marĩa Jeremia aaragia na andũ othe, akiuga atĩrĩ,
2Jehova ekuuga ũũ: Mũndũ ũrĩa ũgũikara itũũra-inĩ rĩrĩ-rĩ, agakua oragĩtwo na rũhiũ rũa njora, na oragwo nĩ ng’aragu, o na mũthiro; no mũndũ ũrĩa ũkoimagara athiĩ harĩ Akalidei nĩegũtũũra muoyo, na ehonokie ta arĩ gwĩtaha etahĩte harĩ gĩkuũ, atũũre muoyo.
3Ningĩ Jehova ekuuga atĩrĩ, Itũũra rĩrĩ-rĩ, rĩtirĩ hingo rĩtarĩneanwo moko-inĩ ma mbũtũ cia ita cia mũthamaki wa Babuloni, nake arĩtunyane.
4Hĩndĩ ĩo anene magĩkĩĩra mũthamaki atĩrĩ, Twagũthaitha ũreke mũndũ ũyũ oragwo, kuona atĩ no kũguoyohia araguoyohia andũ a ita arĩa matigarĩte itũũra-inĩ rĩrĩ, hamwe na andũ arĩa angĩ othe, nĩ ũndũ wa ũrĩa amaaragĩria mohoro ta macio; nĩ ũndũ mũndũ ũyũ ndegũcarĩria andũ aya wega tiga o ũũru.
5Nake Zedekia mũthamaki akiuga ũũ: To we ũcio! E moko-inĩ manyu, amu mũthamaki ndangĩĩka ũndũ mũtekwenda.
6Hĩndĩ ĩo makĩnyita Jeremia, makĩmũikia irima-inĩ rĩenjetwo rĩa maĩ rĩa Malikija mũrũ wa mũthamaki, kũu kĩhingo-inĩ kĩa arangĩri; magĩikũrũkia Jeremia irima-inĩ rĩu na mĩhĩndo. Nakuo kũu irima-inĩ gũtiarĩ maĩ, tiga o mũtondo mũtheri; nake Jeremia agĩgĩtonyerera mũtondo-inĩ ũcio.
7Na rĩrĩ, Ebedi-meleku, Mũkushi ũmwe wehokeirũo wĩra wa nyũmba ya mũthamaki, na agaikara kũu nyũmba ya mũthamaki, aakĩigua atĩ nĩmaikĩtie Jeremia irima-rĩ, nake mũthamaki hĩndĩ ĩo aakorirũo aikarĩte kĩhingo-inĩ kĩa Benjamini,
8Ebedi-meleku ũcio akiumagara akiuma kũu nyũmba ya mũthamaki, agĩthiĩ akĩaria na mũthamaki,
9akĩmwĩra atĩrĩ, Mwathi wakwa, mũthamaki witũ, andũ acio nĩmehĩtie nĩ ũndũ wa maũndũ maya mothe mekĩte Jeremia mũnabii, o ũcio maikĩtie irima; nake hihi ti-itherũ nĩegũkuĩra handũ hau arĩ nĩ ũndũ wa ng’aragu; nĩ ũndũ gũkũ itũũra-inĩ rĩrĩ gũtirĩ irio rĩu.
10Hĩndĩ ĩo mũthamaki agĩatha Ebedi-meleku, ũcio warĩ Mũkushi, akĩmwĩra atĩrĩ, Oya andũ mĩrongo ĩtatũ mũkarute Jeremia ũcio mũnabii kũu irima rĩu atanakua.
11Nake Ebedi-meleku agĩkĩoya andũ acio magĩthiĩ nao, nake agĩtonya nyũmba ya mũthamaki, agĩthiĩ ruungu rũa handũ harĩa haaigagwo mũthithũ wa indo cia bata, akĩoya ndangari iria iteetwo ho, o na itakunyĩ mbuthu cia nguo, agĩciikũrũkĩria Jeremia o kũu irima-inĩ rĩu na mĩhĩndo.
12Nake Ebedi-meleku, ũcio Mũkushi, akĩĩra Jeremia atĩrĩ, Oya ndangari icio o na itakunyĩ icio cia nguo ũciĩkĩre njegeke mwena wa na thĩinĩ wa mĩhĩndo ĩo. Nake Jeremia agĩgĩĩka o ta ũguo.
13Nao magĩkĩgucia Jeremia na mĩhĩndo ĩo, makĩmũruta irima-inĩ rĩu; nake Jeremia agĩikara o kũu kĩhingo-inĩ kĩa arangĩri.
14Ningĩ thutha wa ũguo Zedekia, ũcio mũthamaki, akĩrekania agĩĩtithia Jeremia, ũcio mũnabii, athiĩ harĩ we, monane itonyero-inĩ rĩa gatatũ rĩa nyũmba ya Jehova; nake mũthamaki akĩĩra Jeremia atĩrĩ, Nĩngũkũũria kaũndũ; na menya ũ’hithe ũndũ o na ũrĩkũ.
15Hĩndĩ ĩo Jeremia akĩĩra Zedekia atĩrĩ, Ingĩkuumbũrĩra ũhoro-rĩ, githĩ ti kũũraga ũkũnjũraga? Ningĩ o na ingĩgũtaara-rĩ, ndũrĩ hingo ũngĩnjigua.
16Tondũ ũcio mũthamaki ti Zedekia akĩĩhĩta na hitho, akĩĩra Jeremia atĩrĩ, O ta ũrĩa Jehova atũũraga muoyo, o we ũrĩa watũheire muoyo ũyũ tũrĩ naguo-rĩ, ndikũũraga, o na kana ngũneane moko-inĩ ma andũ arĩa macaragia gũkũruta muoyo.
17Thutha ũcio Jeremia akĩĩra Zedekia atĩrĩ, Jehova Ngai Mũnene wa Ita, o we Ngai wa Isiraeli, ekuuga ũũ: Ũngĩkorũo nĩũkuumagara ũthiĩ harĩ anene a mũthamaki wa Babuloni, nĩũgũtũũra muoyo, wee mwene, na itũũra rĩrĩ rĩticinwo na mwaki; nĩũgũtũũra muoyo wee mwene, o na andũ othe a nyũmba yaku.
18No rĩrĩ, ũngĩaga kuumagara ũthiĩ harĩ anene a mũthamaki wa Babuloni, itũũra rĩrĩ nĩrĩkũneanwo moko-inĩ ma Akalidei, marĩcine na mwaki; o nawe ndũhonoka.
19Nake Zedekia, mũthamaki, agĩkĩĩra Jeremia atĩrĩ, Nĩngwĩtigĩra Ayahudi arĩa meneanĩte harĩ Akalidei, ndikae kũneanwo moko-inĩ mao, nao maninge itherũ ihunyũku.
20Nake Jeremia akiuga atĩrĩ, Aca, matingĩkũneana harĩ o. Ndagũthaitha ũigue mũgambo wa Jehova maũndũ-inĩ macio njarĩtie nawe; tondũ weka ũguo nĩũkona wega, nawe wee mwene ũtũũre muoyo.
21No rĩrĩ, warega gũthiĩ-rĩ, ũhoro ũyũ nĩguo Jehova anyonetie:
22Atĩrĩrĩ, andũ-a-nja othe arĩa matigĩtwo nyũmba ya mũthamaki wa Juda nĩmagatwarĩrũo anene a mũthamaki wa Babuloni, na nĩmakoiga atĩrĩ, Arata aku arĩa mũmenyaine nao nĩo makũhenetie, magagũkĩria hinya; na tondũ wa ũrĩa magũrũ maku marikĩte mũtondo-inĩ nĩmakũhutatĩire magagũtirika.
23Nao aka aku othe, o na ciana ciaku, nĩmakaneanwo harĩ Akalidei, nawe ndũkahonoka no nĩũkanyitwo nĩ mũthamaki wa Babuloni, na wee nĩwe ũgatũma itũũra rĩrĩ rĩcinwo na mwaki.
24Hĩndĩ ĩo Zedekia agĩkĩĩra Jeremia atĩrĩ, Menya ũreke mũndũ o na ũmwe amenye ũhoro ũcio, nawe ndũkua.
25No rĩrĩ, anene mangĩigua atĩ nĩnjarĩtie nawe, nao moke kũrĩ wee, makwĩre atĩrĩ, Tuumbũrĩre maũndũ marĩa wĩrĩte mũthamaki; menya ũtũhithe, na tũtikũũraga; o na ningĩ ũtwĩre ũrĩa mũthamaki akwĩrĩte-rĩ,
26hĩndĩ ĩo ũkĩmere atĩrĩ, Nĩ gũthiĩ ndathiĩte kũgũĩra mũthamaki thĩ o mbere yake ndĩmũthaithe, nĩ getha ndakanjokie nyũmba ya Jonathani, nguĩre kuo.
27Na rĩrĩ, thutha wa ũguo anene othe magĩgĩthiĩ he Jeremia, makĩmũũria ũhoro ũcio; nake akĩmahe ũhoro ũcio o ta ũrĩa maũndũ mothe maatariĩ marĩa aathirũo nĩ mũthamaki. Tondũ ũcio magĩgĩtiga kwaria nake; nĩ ũndũ ũhoro ũcio ndwekũũĩtwo ũrĩa ũtariĩ.
28Nake Jeremia agĩgĩtũũra kĩhingo-inĩ kĩu kĩa arangĩri o nginya hĩndĩ ĩrĩa Jerusalemu rĩatunyanirũo. Na gũgĩkinya atĩrĩ, atĩ hĩndĩ ĩrĩa Jerusalemu rĩatunyanirũo-rĩ,
Sign in to highlight verses and keep them in sync with the mobile app.